Një dokument i lëshuar së fundmi tregon se Shtetet e Bashkuara të Amerikës do të zgjerojnë kapacitetet bërthamore për shkak të shqetësimeve në lidhje me arsenalin bërthamor në rritje të Rusisë.
Ky veprim po konsiderohet nga kritikët si një lëvizje që mund të rrisë rreziqet e fërkimeve mes dy shteteve.
Fokusi mbi Rusinë është në linjë me prioritetin e Pentagonit që po zhvendoset nga lufta kundër militantëve islamikë, drejt konkurrencës me fuqitë e mëdha si Moska dhe Pekini.
“Strategjia jonë do të sigurojë që Rusia të kuptojë se çdo përdorim i armëve bërthamore, sado i kufizuar, është i papranueshëm”, shkruhet në dokumentin e njohur si Rishikimi i Pozicionit Bërthamor.
Mbi dokumentin ka reaguar Ministri i Jashtëm i Rusisë, i cili në një deklaratë ditën e shtunë u shpreh i shqetësuar mbi përmbajtjen e dokumentit. Sipas tij, atje shfaqej një ndjesi përballjeje dhe një orientim anti-rus.
Zgjerimi i kapacitetit me shumë gjasa do të përfshijë ndërtimin e armëve bërthamore me kapacitet të ulët. Gjithsesi ky kapacitet do të jetë i ngjashëm me atë të bombës atomike të hedhur në Hiroshima.
Argumenti për këto armë është se bombat më të mëdha bërthamore janë aq katastrofike saqë nuk do të përdoren kurrë dhe nuk funksionojnë si një sigurues efektiv. Me më pak fuqi dhe shkatërrim, opsioni bërthamor i këtyre armëve bëhet potencialisht më i përdorshëm, duke garantuar në këtë mënyrë më mirë shmangjen e konflikteve.
