Tashmë fshatrat e jugut kanë një manual praktik për mbrojtjen dhe ruajtjen e banesave tradicionale përgjatë bregdetit të Himarës.
Fshatrat e Jugut të Shqipërisë janë unike përsa i përket pozicionit që kanë kundrejt mjedisit natyror përreth, peizazhit dhe tipareve arkitektonike.
Zona në fokusin e këtij udhëzuesi përfshin 14 fshatra të rajonit bregdetar të Himarës, përkatësisht, Palasë, Dhërmi, Ilias, Vuno, Himarë fshat, Pilur, Kudhës, Qeparo i vjetër, Borsh, Piqeras, Sasaj, Lukovë, Shën Vasil dhe Nivicë.
Qëllimi i këtij udhëzuesi është jo vetëm të shpjegojë kontekstin dhe karakterin e këtyre fshatrave, por edhe të japë këshilla dhe të orientojë të gjithë ata që merren me zhvillimin, rinovimin ose rikonstruksionin e ndërtesave të fshatit.
Ky udhëzues është i vlefshëm si për banorët, pronarët apo qiramarrësit e ndërtesave, por edhe për institucionet, administratorët, kompanitë ndërtuese, mjeshtërit e ndërtimit dhe artizanët.
Ai është hartuar në kuadër të Programit: “Zhvillimi i Integruar dhe i Qëndrueshëm i Rajonit Bregdetar Jugor”, zbatuar nga GIZ Albania, në bashkëpunim të ngushtë me Ministrinë e Infrastrukturës dhe Energjisë, Ministrinë e Kulturës, Institutin e Monumenteve të Kulturës, DRKK Vlorë dhe Bashkia Himarë.