Te tjera detaje nga sekuestrimi i pasurise marramendese ne llogarite bankare te babë e bijë ne Lezhe, qe dje iu sekuestruan 5.2 milionë euro dhe 7 apartamente.
Hetimet janë nisur nga Policia dhe Prokuroria e Lezhës pas sinjalizimeve të ardhura nga një bankë e nivelit të dytë në qytetin e Lezhës.
Llogaritë bankare dhe apartamentet e sekuestruara janë në pronësi të Pjetër Vocit, 83 vjeç dhe vajzës së tij Shqipe Palaj, 50 vjeçe dhe dyshohen se janë përfituar nga veprimtari kriminale. Hetimet e Policisë nisën menjëherë, pasi në llogaritë bankare në emër të 50- vjeçares, mbërritën shuma të mëdha parash në një kohë shumë të shkurtër. Transaksioni është kryer ditët e fundit nga familjarë të këtyre dy personave që jetojnë në Zvicër drejt llogarisë së saj në një bankë të nivelit të dytë.
Sipas informacioneve të marra në mënyrë konfidenciale, bëhet e ditur se 50-vjeçarja mund t’i ketë marrë këto para të dërguara nga kunati i saj. Paratë nisën të tërhiqeshin dhe me to të bliheshin prona të paluajtshme, në qytetin e Lezhës dhe Tiranës, ku në emër të Palajt dhe babait të saj, figurojnë 7 apartamente.
Me gjithë dyshimet e forta për para që vijnë nga aktivitete kriminale, që kanë të bëjnë me trafikun e drogës, hetimi për 50-vjeçaren dhe babain e saj do të bëhet në gjendje të lirë, pasi vetë ata nuk janë të përfshirë në aktivitet kriminal në mënyrë të drejtpërdrejtë.
Pas hetimeve të para me kërkesën e prokurorit Erjon Shehaj, Gjykata e Rrethit Gjyqësor Lezhë me vendim nr. 17 datë 23.01.2019 ka vendosur sekuestrimin e llogarive bankare si dhe të 7 apartamenteve në Lezhë dhe Tiranë. Pas vendosjes së sekuestros, ndaj babë e bijë ka nisur procedim për veprën penale të pastrimit të parave.
“Në kuadër të operacionit ‘Forca e Ligjit’, sekuestrohen rreth 5.2 milionë euro llogari bankare dhe pasuri të paluajtshme të dy shtetasve, të dyshuara të përfituara nga veprimtari kriminale. Sekuestrot janë rezultat i punës hetimore të Policisë së Lezhës, që ka referuar materialet procedurale mbi bazën e dyshimit të arsyeshëm për përfitimin e tyre nga veprimtaria kriminale, me Prokurorinë e Rrethit Gjyqësor Lezhë.
Prokuroria ka filluar procedimin penal për veprën ‘Pastrim i produkteve të veprës penale ose të veprimtarisë kriminale’ në ngarkim të dy shtetasve, duke e finalizuar me sekuestro të vendosur nga Gjykata e Shkallës Parë Lezhë, me vendim të datës 23 janar 2019. Sekuestrot janë llogari bankare në vlerë totale rreth 5.2 milionë euro dhe 7 apartamente”, bëhet e ditur nga Policia.
