Një adoleshente “e tmerruar” nga humbja e lirisë për shkak të izolimit nga koronavirusi, ka vrarë në mënyrë tragjike veten, raporton “The Sun”.
Familja e saj kishte vendosur të izolohej pak ditë para vdekjes, pasi njëra nga motrat e saj kishte kollë.
Në mënyrë tragjike, Emily u gjet në gjendje të rëndë në shtëpi nga nëna dhe motra e saj, më 18 mars.
Emily nuk arriti ta rimerrte veten dhe vdiq katër ditë më vonë, më 22 Mars.
Babai i saj, Timothy Owen, tha se Emily kishte pasur probleme me shëndetin mendor dhe se ishte diagnostikuar me autizëm në vitin 2018.
Ai tha që familja po përgatitej për t’u transferuar në Cornwall, ku Emily mezi priste fillimin e ri.
Sipas tij, Emily kishte dashur të dilte me makinë mëngjesin që vdiq, por nuk mundej, pasi motra e saj kishte kollë dhe familja ishte e izoluar.
Babai tha: “Ajo ishte e shqetësuar se do të humbte lirinë dhe pavarësinë e saj, se nuk do të ishte në gjendje të shkonte në punë dhe në palestër ose të ngiste makinën dhe të dilte jashtë”.
Motra e Emily, Annabel Owen, 21 vjeç, tha menjëherë pas vdekjes së saj: “Ajo nuk mund ta përballonte mbylljen dhe anullimin e planeve, si dhe të qëndruarit brenda. Kjo e tmerroi. ”
Prindërit, dy motrat dhe vëllai i saj, e përshkruanin Emily-n në një postim në Facebook si “vajzën dhe motrën tonë të bukur, gazmore, të talentuar dhe pak të çmendur”.
Postimi shtoi: “Të gjithë jemi absolutisht të shkatërruar, por edhe jashtëzakonisht krenarë për gjithçka ajo arriti në jetën e saj. Shumë njerëz na kanë dërguar mesazhe gjatë pesë ditëve të fundit duke na thënë se si Emily i kishte ndihmuar në periudha të vështira, dhe ne nuk e dinim se sa ndikim pozitiv kishte ajo tek njerëzit përreth saj”.
