Mesfushori i Barcelonës, Arthur, ka thënë se po lutet që Neymar të kthehet në “Camp Nou”. Ylli brazilian bëri një transferim prej 222 milionë eurosh nga Barcelona te PSG, në verën e vitit 2017, dhe e ndihmoi ekipin e tij të fitojë në mënyrë të trefishtë në Francë, në sezonin e parë në këtë klub.
Megjithatë, ka pasur thashetheme të vazhdueshme se 26-vjeçari është i pakënaqur në Ligue 1 dhe mund të jetë në rrugën e largimit. Real Madridi thuhet se po ndjek situatën e Neymar, por edhe një kthim i bujshëm te Barça është i diskutueshëm.
Dhe shoku i ekipit kombëtar të Neymar, i cili vetë bëri një transferim prej 40 milionë eurosh nga Gremio në “Camp Nou”, në verë, shpreson që një ditë ta shohë atë të kthehet te Barcelona. “Personalisht jam duke u lutur që ai të vijë, sepse është një superstar, ka potencial të padiskutueshëm, – tha Arthur për “Mundo Deportivo”. – Unë mendoj se sa më shumë lojtarë të mëdhenj të ketë ekipi, aq më mirë“.
22-vjeçari, gjithashtu, ka zbuluar se, më shumë se thjesht duke u lutur, po bën punë prapa skenave për ta bindur Neymar që të kthehet në Katalonjë: “Personalisht, po bëj shumë punë për ta kthyer atë, por në fund të fundit ka jetën e tij. Ai e di atë që po bën dhe nuk e di se sa të thella janë negociatat, nëse ka mundësi për të ardhur apo jo.
Por, ai është një mik personal dhe një profesionist, që e admiroj shumë. Do të isha shumë i lumtur nëse mund të kthehet këtu“. Neymar ka qenë në formë të jashtëzakonshme me PSG në sezonin 2018-2019, duke shënuar 16 gola në 18 ndeshje, deri më tani.