Shtatë vjet e gjysmë burg për një shqiptar, i cili me vite të tëra kishte keqtrajtuar e dhunuar gruan e tij. Gjatë marrjes në pyetje ai kishte thënë: «Pse? Po unë një shqiptare e kam rrahur, jo një zvicerane».
Nganjëherë është torturë të lexosh gazetat. Për shembull numrin e së premtes të «Neue Zürcher Zeitung». Në një kohë kur gjithnjë e më shumë gra në mbarë botën rrëfejnë mbi dhunën psikike dhe ngacmimet seksuale të burrave të papërgjegjshëm, para Gjykatës së Qarkut në Zürich të enjten ka dalë një shqiptar i akuzuar se me vite të tëra e ka terrorizuar gruan e tij.
Sipas përshkrimit të gazetës i akuzuari i përket me sa duket asaj kategorisë së ardhacakëve shqiptarë në Zvicër që shiten si intelektualë, por me çdo fjalë që asin dëshmojnë injorancën e tyre të pafundme. Para trupit gjykues i akuzuari tha se xhelozia është pjesë e mentalitetit shqiptar, rrjedhimisht diçka krejt normale. Por, çfarë i ka bërë ai gruas së tij mes viteve 2014-2016 nuk është fare normale. Aktet gjyqësore asin se 63-vjeçari, i shtyrë nga xhelozia, ia ka bërë jetën ferr gruas së tij 11 vjet më të re: duke e dhunuar, duke e detyruar për kontakte seksuale, duke ia rrezikuar jetën, duke e kërcënuar dhe rrahur. Marrëdhëniet mes çiftit u ashpërsuan kur i akuzuari kishte parë në tetor të vitit 2014 një burrë shqiptar të ulur në një bankë, e cila gjendej afër vendit të punës të gruas së tij.
Tani e tutje shqiptari jetoi në një botë tjetër, duke e fajësuar gruan e tij se po e tradhëtonte me shqiptarin e ulur në bankë. Me gjasë i akuzuari kishte kohë të vëzhgonte hap pas hapi gruan e tij, fundja ishte pensionist invalidor. E rrihte, e kërcënonte, e dhunonte. Nga janari i vitit 2016, sipas «Neue Zürcher Zeitung», ai për çdo ditë rrinte te një kiosk afër vendit të punës së gruas së tij. Ai e akuzonte bashkëshorten për kontakte intime me disa burra. I akuzuari, i cili para trupit gjykues tha se kishte studiuar ekonominë në Universitetin e Prishtinës, sipas një ekspertize psikiatrike vuan nga një çrregullim personaliteti me tipare narcisoide, dominuese dhe impulsive.
Në gusht 2016 djali i përbashkët i çiftit e bindi nënën e tij të shkojë në polici për ta denoncuar burrin e saj terrorizues. Një kohë të gjatë ajo kishte refuzuar të bënte këtë. Që nga atëherë burri gjendet në burg, ndërsa gruaja në trajtim psikiatrik, njofton dialogplus. Sipas «Neue Zürcher Zeitung» ky shqiptar kishte ardhur nga Kosova në Zvicër para 25 vitesh, ku ishte martuar me një zvicerane 14 vjet më të moshuar. Pas pesë vitesh martesa ishte divorcuar dhe ai ishte martuar me gruan e tanishme shqiptare. Në pyetjen se sa vite është i martuar dhe sa vjeç është djali i tij, ekonomisti tha se nuk e dinte, sepse ka probleme me shifra. Ai tha se sjellja e tij e dhunshme është pasojë e ilaçeve që merr. Por, ai tha se nuk e ka dhunuar gruan e tij. Pas pyetjeve insistuese të gjyqtarit ai pranoi se herë pas herë kishte preferuar praktika më të ashpra seksuale. «Por, ajo kurrë s’ka thënë se nuk i pëlqente».
Gazeta shkruan se gruaja ishte e pranishme gjatë shpalljes së aktgjykimit dhe disa herë shpërtheu në vaj, por megjithatë kërkoi që burri i saj të lirohet dhe pas terapisë të kthehet në shtëpi. Edhe burri i saj kërkoi një gjë të tillë. Trupi gjykues pati mendim tjetër. Shtatë vjet e gjysmë duhet të qëndrojë ky shqiptar në burg për shkak të terrorizimit të gruas së tij. Gjykatësit theksuan se shqiptari nuk ishte penduar për veprat e tij. Gjatë marrjes në pyetje ai madje kishte thënë: «Pse? Po unë një shqiptare kam rrahur, jo një zvicerane».
