Ibsen Elezi i ka dërguar një shkresë Sali Berishës dhe strukturave të tjera të Partisë Demokratike, ku kërkon përjashtimin e deputetit dhe njëherësh Sekretarit Flamur Noka. Kjo, vjen pas firmës që Noka ka dhënë për regjistrimin e komunistit Marko Dajti si kandidat për Bashkinë e Tiranës.
“Ne mbrojtje te statutit dhe imazhit te PDSH, sot iu drejtova strukturave drejtuese te saj me ane te nje kerkese me shkrim per perjashtimin nga antaresia te deputetit te Partise Frontit te Majte shokut Flamur Noka”, thotë ndër të tjera Elezi, teksa publikon shkresën për Berishën dhe firmën e Nokës.
Dokumenti i dytë, tregon se me firmë të deputetit demokrat Flamur Noka, Partia Fronti i Majtë e Marko Dajtit, është regjistruar për zgjedhjet lokale të 14 Majit. Një vendim i pakuptueshëm i Flamur Nokës për të mbështetur Marko Dajtin për Tiranën, në një kohë që grupimi i drejtuar nga Sali Berisha ka kandidatin e vetë, Belind Këlliçin.
“Partia Fronti i Majte si drejtues te saj ka shokun Marko Dajti, Sekretar i Pare i Komitetit Qendror te saj dhe e quan veten si trashegimtarja e PPSH”, shkruan demokrati Ibsen Elezi.
