Këshilli i Ministrave ka marrë vendimin për t’i dhënë Shkollës së Magjistraturës truallin e nevojshëm për të ndërtuar godinën e re. Bëhet fjalë për 3205 metra katrorë, nga sipërfaqja prej 12,478 metrash katrorë pranë Fakultetit të Gjeologjisë dhe Minierave, e cila në Nëntor të vitit 2014 i kaloi në përgjegjësi Ministrisë së Drejtësisë për Gjykatën e Lartë.
Siç duket edhe në fotot e projektit, godina ku ndodhet aktualisht Shkolla e Magjistraturës, pas fakultetit, do të shembet për të ngritur sallat e Gjykatës së Lartë, ndërsa vetë Shkolla e Magjistraturës do të ndërtohet përballë fakultetit.
Ndërtesa e Gjykatës së Lartë do të jetë e lidhur me pjesën ekzistuese dhe e ndërthurur me ambientin përmes formës dhe tarracave të gjelbëruara, ndërsa Shkolla do të pozicionohet në cep, në hapësirën 3205 metra katrorë.
Shkolla e Magjistraturës filloi veprimtarinë e saj mësimore në Tetor të vitit 1997 dhe është përgjegjëse për formimin e kandidatëve për magjistratë në pozicione të ndryshme, si edhe për formimin e vazhdueshëm profesional të magjistratëve në detyrë, avokatëve të shtetit, ndihmësve ligjorë dhe kancelarëve.
Ndërkohë projekti për këto objekte u miratua në vitin 2015, ku fituese e konkursit u zgjodh firma sllovene Sadar Vuga./ scantv
