Pasditen e 15 marsit, Dragomir Cumpaljevic, 76 vjeçar, rreth orës 14:00 kishte dal nga shtëpia për të shkuar në vizitë tek motra e tij në fshatin Sevce i Komunës së Shtërpcës. Por, i njëjti nuk u kthye më i gjallë në shtëpi. Ai dy ditë më vonë u gjet i vdekur në lumin e fshatit Sevce nga bashkëfshatarët. Organet e hetuesisë po cilësojnë të dyshimtë vdekjen e të moshuarit, ndërkohë që trupi i pa jetë i tij është dërguar për autopsi.
76-vjecari nga fshati Sevce i komunës së Shtërpcës, të enjten e javës së kaluar kishte shkuar për vizitë tek motra e tij në po të njëjtin fshat. Kishte qëndruar për disa orë te motra duke u larguar më pas. Familjarët kanë raportuar se 76 vjecari gjatë vizitës te motra kishte shkuar në gjendje të dehur.
Por, që nga ai moment, familjarët më nuk e gjetën të gjallë 76 vjeçarin. Ai një ditë më vonë u raportua si person i zhdukur, për t‘u gjetur i vdekur në lum, vetëm pas tri ditëve nga ana e bashkëfshatarëve.
Lajmin rreth këtij rasti e ka konfirmuar për Express, majori në policinë rajonale të Ferizajt, Bastri Shabani. Ai ka thënë se rasti po cilësohet si vdekje e dyshuar, ndërkohë që hetimet për këtë punë po vazhdojnë ende.
“Ne e kemi pas një person të lajmëruar si të zhdukur. Pas dy ditëve i njëjti është gjetur pa shenja jete në lumin e fshatit Sevce, të komunës së Shtërpcës. Rastin e ka paraqitur motra e tij e cila e ka raportuar si të zhdukur. Viktima ishte i lindur në vitin 1942.
“Ai nuk ka pasur ndonjë shenjë në trup”, ka deklaruar Shabani për Express.
E ndërkohë trupi i pa jetë i 76 vjeçarit është dërguar për obduksion në Institutin e Mjekësisë Ligjore në Prishtinë.
