Avokati i ish-drejtores së Marrëdhënieve Juridiksionale me Jashtë në Prokurorinë e Përgjithshme, Rova Gashi, pretendon se shkarkimi i saj më 29 dhjetor të vitit që lamë pas nga Kryeprokurorja Arta Marku lidhet me ekstradimin e “financierit” të Habilajve, Nezar Seitin.
Deklarata qesharake e avokatit Çlirim Gjata eshte bere pas mbylljes së seancës së radhës në Gjykatën Administrative të Tiranës, ku po zhvillohet procesi për lirimin nga detyra të Gashit. Teksa për ekstradimin e Seitit po bëhen verifikime dhe ka edhe një procedim penal të hapur nga Prokuroria e Durrësit, Gjata jep versionin e tij për atë që ka ndodhur.
Sipas tij, ish-drejtorja e Marrëdhënieve Juridiksionale me Jashtë në Prokurorinë e Përgjithshme ka pasur bazën e të dhënave që pengonin ekstradimin e Seitit, pasi për të ka çështje penale të hapur nga Prokuroria e Krimeve të Rënda.
“Shkarkimi i Rovena Gashit ka lidhje me ekstradimin e Nezar Seitit, që ka qenë hapur në shkelje me ligjin. Sepse ndalohet, edhe kur është marrë vendimi, të ekstradohet një person kur ndaj tij ka një procedim penal në vendin tonë. Pra, pezullohet ekzekutimi i ekstradimit kur ka çështje penale këtu. Ka një bazë të dhënash në Drejtorinë e Marrëdhënieve Juridiksionale me Jashtë në Prokurorinë e Përgjithshme dhe ky person, që ka vendosur Gjykata të ekstradohet, verifikohet nëse ka ndonjë pengesë për t’u ekstraduar. Pra, lirimi i zonjës Gashi nga detyra që mbante, pra, që kishte këtë databazë të dhë- nash dhe ndodhja e ekstradimit pikërisht pas kësaj ngjarjeje, a nuk na bën neve të mendojmë?”, tha Gjata ditën e djeshme pas seancës.
- SEANCA
Në seancën e djeshme në Gjykatën Administrative, avokati i Rovena Gashit kërkoi sqarime për motivacionin e lirimit nga detyra të klientes së tij. Ai tha para gjyqtarit të çështjes se Prokurorja e Përgjithshme, Arta Marku, ka marrë më shumë kompetenca sa i lejon ligji me urdhrin e shkarkimit. Gjithashtu, sipas Gjatës, në urdhrin e shkarkimit nuk jepet asnjë motivacion për lëvizjen.
Gjata argumentoi se Prokurorja e Përgjithshme e Përkohshme vepron vetëm brenda dispozitave kalimtare dhe nuk ka kompetencat e një prokurori të përgjithshëm të zgjedhur nga KLP-ja. Ai, madje, në fund të seancës, depozitoi një kërkesë me shkrim që në gjyq të vijë edhe vetë Kryeprokurorja e Përkohshme Arta Marku, që të përballet me klientin e tij. Gjyqtari i seancës do të shprehet për kërkesën e Gjatës në seancën e ardhshme, më 13 shkurt.
