SHKARKIMI I PRESIDENTIT AMERIKAN/ Donald Trump i vendosur: Hetimi, sulm politik i demokratëve

Presidenti amerikan Donald Trump ka këmbëngulur dje në një intervistë se hetimet ndaj tij për procesin e shkarkimit, janë një tjetër episod i sagës të gjatë të tentativave të kundërshtarëve të tij politikë për të mos ta lejuar atë që të fitojë zgjedhjet presidenciale të vitit 2020. Një ditë pasi ligjvënësit demokratë mbyllën javën e dytë me dëshmi publike nga zyrtarët e Shtëpisë së Bardhë dhe zyrtarë të tjerë të administratës, presidenti përsëriti në një intervistë një-orëshe telefonike me rrjetin “Fox News”, se demokratët vunë në shënjestër fushatën e tij që nga fillimi, dhe se dyshon se Shtëpia e Bardhë nën Presidentin Barack Obama, ishte e përfshirë në këto përpjekje. “Ke të bësh me nivelet më të larta të qeverisë. Ata përgjonin fushatën time”, tha zoti Trump, i cili më tej bëri krahasimin mes situatës aktuale dhe akuzave për ndihmë nga Rusia për fitoren spektakolare në presidencialet e 2016. Trump vazhdon të këmbëngulë se një kompani ukrainase luajti rol për mbajtjen e një serveri me informacion nga fushata presidenciale e Hillary Clintonit dhe në intervistën e djeshme tha se po i kërkonte presidentit ukrainas informacion për atë teori. “Ata e kanë serverin. Dua ta shoh atë server dhe FBI akoma nuk e ka marrë. Një kompani ukrainase e ka serverin. Për këtë ishte telefonata me Zelensiy. Ne duam të shohim nëse ka korrupsion”, tha ai.