Gjykata Kushtetuese është aktualisht jashtë funksionit për shkak të mungesës së gjyqtarëve. Nga 1 janari 2018 në Gjykatën Kushtetuese janë depozituar 98 kërkesa, ku një pjesë janë shqyrtuar vetëm në Kolegj dhe një pjesë janë në pritje të shqyrtimit.
Numri i çështjeve që kanë kaluar Kolegjin dhe janë në pritje të gjykimit në seancë, janë 11 kërkesa, nga këto, 5 kërkesa kanë në objektin e tyre kundërshtimin e ligjeve, dhe VKM-ve. Ndërsa pjesa tjetër vijojnë të jenë pezull për mungesë të gjyqtarëve.
Kërkesat e depozituara në Kushtetuese janë kryesisht për kundërshtimin e VKM-ve, padi këto të ngritura nga Shoqata e Pronarëve.
Nga 9 anëtarë, aktualisht Gjykata Kushtetuese ka mbetur me dy anëtarë, kryetarin e saj, Bashkim Dedja dhe anëtaren Vitore Tusha, të vetmit që kanë kaluar Vettingun. Pjesa tjetër e trupës së Kushtetueses janë dorëhequr ose u shkarkuan nga KPK si Besnik Imeraj, Sokol Berberi, Vladimir Kristo, Altina Xhoxhaj, Fatmir Hoxha, Gani Dizdari etj.
