Ministria e Drejtësisë thellon reformimin e institucioneve të varësisë, duke i futur ato në “shinat” e ligjshërisë. Drejtoria e Shërbimit të Provës, pasi ka kaluar në sitën e burimeve njerëzore strukturën e saj, ka konstatuar se 63 punonjës janë emëruar 3 vitet e fundit në kundërshtim me ligjin për Nëpunësin Civil.
Kjo do të thotë se asnjëri prej tyre nuk i është nënshtruar konkursit pranë Departamentit të Administratës Publike. Një standard i panegociueshëm ky, si detyrim i Shqipërisë në përafrimin e standardeve të BE për administratën.
Engjëll Hysi, njëherazi bashkëshorti i deputetes socialiste Vasilika Hysi, i tha AlpeNews.al se i gjithë ky proces i është nënshtruar procedurave standarde. Sipas tij, në muajin shtator Departamenti i Administratës Publike ka ushtruar një audit te Shërbimi i Provës, ku midis të tjerash ka konstatuar se 63 punonjës janë emëruar 3 vitet e fundit në kundërshtim me ligjin për Nënpunësin Civil.
Pra 63 punonjës, janë emëruar nga ish-drejtori pa konkuruar pranë DAP. Dhe në muajin shkurt të këtij viti, DAP ka dërguar raportin përfundimtar, në rekomandimet e të cilit, përcaktohet ndërprerja e marrëdhënieve të menjëhershme me punonjësit e rekrutuar në kundërshtim me ligjin për nënpunësin civil.
Para disa ditësh, punonjësit janë njoftuar zyrtarisht të paraqiten te drejtoria e burimeve njerëzore, për të diskutuar ndërprerjen e marrëdhënieve të punës mbi bazën e rekomandimeeve të DAP.
Në takimin që është zhvilluar u është shpjeguar shkaku ligjor i ndërprerjes, duke shmangur presionet për dorëheqje apo ndjekjen e rregullave ekstraligjore.
Pas këtij komunikimi të kryer nga një komision i ngritur për këtë rast, veprimet për ndërprerjen e marrëdhënieve të punës të 63 punonjësve, do të kryhen me kujdesin maksimal, pasi bëhet fjalë për një institucion që mbikëqyr persona të dënuar me masa alternative.
Përgatiti: Alpenews.al