Ekipet e kërkim-shpëtimit janë ende duke vijuar kërkimet për shpëtimin e personave që ndodhen nën rrënojat e pallatit 12-katësh të shembur në Miami të SHBA-ve.
Sipas autoriteteve, në mesin e 51 personave të shpallur të humbur, janë dhe 4 shtetas nga Venezuela e 8 të tjerë nga Argjentina.
Për këtë arsye, autoritetet amerikane ka njoftuar konsullatat e këtyre dy vendeve mbi këtë zhvillim. Kujtojmë se pallati, u shemb në orët e para pas mesnate, ndërsa nuk dihen ende shkaqet. Deri më tani, për fat të keq, 1 person është shpallur i vdekur, ndërsa dhjetëra të tjerë janë duke u kërkuar nën gërmadha.
Mediat e huaja kanë publikuar pamje të shembjes së ndërtesës, por edhe të ambienteve të brendshme të apartamentit, e cila fikson momentin pak para shkaktimit të ngjarjes tragjike. Gjithashtu, në mesin e videove është dhe ajo e shpëtimit të një fëmije, që për fat të mirë kishte marrë dëmtime të lehta trupore.
