Ministria e Shëndetësisë vijon bisedimet me mjekët e Urgjencës së QSUT pas dorëheqjes që dorëzuan ditën e sotme për shkak të kushteve të punës. Zv/ ministrja e Shëndetësisë Mira Rakacolli zhvilloi një takim me mjekët në QSUT duke u njohur me shqetësimet e tyre. Pas takimit me zv/ministren e Shëndetësisë mjekët e Urgjencës së QSUT duket se janë tërhequr nga qëndrimi, pasi deklarojnë se çështje po zgjidhet me drejtorinë e QSUT.
Shefi i Shërbimit të Urgjencës Edmond Zaimi është shprehur se nuk kanë dhënë dorëheqjen edhe pse në letrën e publikuar në media duket qartësisht e firmosur nga tetë mjekët. Zaimi shprehet se kërkesa bëhet për të zgjidhur problemet dhe mbingarkesën e punës dhe se janë në diskutime me drejtorinë, por puna në QSUT vijon normalisht.
“Situata është e ngarkuar me shuam të sëmurë nga e gjithë Shqipëria. I kalon kapacitetet e shërbimit tonë, me ngarkesë të madhe për personelin, ç’ka bën që edhe rreziku i gabimeve njerëzore të shtohet. Në këto kushte i gjithë stafi ka shkruar një peticion për drejtorin e Urgjencës, por akoma nuk është dorëzuar dhe nuk është bërë zyrtare.
Është një problem që ka ekzistuar, por është thelluar ditët e fundit duke bërë të pamundur vazhdimësinë e punës. Por janë problem që ne kërkojmë të zgjidhen mes njeri tjetrit duke sensibilizuar edhe opinionin për të shfrytëzuar shërbimin vetëm për shërbimet e urgjencës.
Ne nuk kemi dhënë dorëheqjen në 1997, absolutisht jo. Kjo është një kërkesë e jonë për të rregulluar problem, është puna e drejtorisë më tej për të zgjidhur problemet. Shërbimi është njëlloj sikur ka qenë më parë, por ngarkesa është tejet e madhe” tha ai.
Tetë mjekë të QSUT dhanë sot dorëheqjen nga vendi i punës në mënyrë kolektive. Dorëheqja iu është drejtua drejtorit të QSUT, Presidentit, Kryeministrit dhe Ministrisë së Shëndetësisë. Shkak për dorëheqjen sipas mjekëve është bërë gjendja e papranueshme në Urgjencën e QSUT.
Ata shprehen në letër se nuk kanë kushte pune dhe kanë mbingarkesë me të sëmurë të shtruar në spital. “Japim dorëheqjen për shkak të kushteve të punës. Ka mbingarkesë, të sëmurë të shtruar që qëndrojnë mbi 48 orë, mungesë vendesh në pavionet, shërbimet nuk zbatojnë urdhrat” thuhet në letër.
Letra e plotë e mjekëve
Memo/ Datë 05.12.2017
Drejtuar; Enkelejd Joti
Drejtori i QSUT
Për dijeni; Znj. Ogerta Manastirliu
Ministre Shëndetësisë
Z. Edi Rama
Kryeministër i Shqipërisë
Z.Ilir Meta
President i Shqipërisë
Kërkesë
Në kuadër të situatës së krijuar në Urgjencës e QSUT, ku;
- Kushtet e punës për stafin nuk plotësohen bazuar në kontratën punëdhënës- punëmarrës
- Ka mbingarkesë me të sëmurë të shtruar mbi 48 orë në urgjencë për mungesë vendesh në pavionet e tjera në kundërshtim me urdhrin
- Mos zbatimi i urdhrave të tjerë të nxjerrë nga drejtoria nga shërbimet e tjera që reflektojnë mbingarkesën e urgjencës
- Në këto kushte ku për shkak të mbingarkesës, e cila nuk lidhet me punën e mjekëve por të shërbimeve; Tërhiqemi nga pozicioni i punës duke respektuar paralajmërimin sipas Kodit të Punës me 30 dite perpara.
Mjekët që e kanë firmosur letrën janë;
Petrit Gjorgji
Elton Calliku
Besmir Kocia
Etiomena Bracaj
Jonida Kito
Petrit Vargu
Afrim Yzeiraj
Eqerem Hasani