Vitet e punës në kuzhinë të kaluara mes provash dhe shumë gabimesh, kanë bërë që shefat e kuzhinës ta kuptojnë shumë mirë ndjenjën që lind te ata persona që gatuajnë qoftë edhe gjërat më të thjeshta në shtëpinë e tyre. Fatmirësisht, shefat kanë mësuar se si t’i shmangin këto gabime dhe më poshtë kanë ndarë për të gjithë të interesuarit sekretet e tyre.
Gjithsesi, këshilla më e mirë nga të gjitha është që të mos dorëzoheni kurrë.
“Ndonjëherë prishni gjithçka, ndonjëherë nuk e bëni recetën siç duhet ose nuk shijon siç e prisnit. Provojeni përsëri. Provojeni po atë ditë ose ditë tjetër. Provojeni derisa ta bëni mirë dhe t’ju pëlqejë ajo që keni bërë. Kuzhinierët profesionistë i bëjnë gjërat disa herë derisa mendojnë se shijon siç duhet”, thotë Gabe McMackin, shefi dhe pronari i “The Finch” (SHBA).
Ja këshillat e shefave amerikanë:
Bruce Bromberg, shef dhe bashkëpronar i “Blue Ribbon Resaturants”
“Mendoj se njerëzit bëjnë dy gabime të mëdha në kuzhinë: gatimi më pak seç duhet dhe më shumë seç duhet i ushqimit. Shtëpiakët kanë tendencë që ta pjekin më shumë seç duhet pulën dhe ta ziejnë më pak seç duhet supën. Këshilloj që të familjarizoheni me kohëzgjatjen e gatimit të pjatave të ndryshme, ta provoni atë që po bëni ndërkohë që po bëhet dhe të provoni gjëra të ndryshme. Mbani shënim çfarë nuk shkon dhe çfarë është mirë“.
Alex Leonard, shef te “Lowlife”
Njerëzit nuk përdorin pajisjet e duhura për gatim. Thikat e mprehta janë të rëndësishme dhe gjithashtu është e rëndësishme kontrolli i nxehtësisë.
Tadashi Ono, drejtor kulinar te Ganso
“Të mos shijosh ushqimin gjatë gatimit dhe mos ta kontrollosh atë janë gabimet më të mëdha. Kjo vlen për të gjitha ushqimet, sidomos kur recetat merren nga librat e gatimit. Librat e gatimit vlejnë vetëm si udhëheqës, e keni vetë në dorë pastaj”.
Bobby Flay, shef dhe pronar i Gato
“Njerëzit nuk përdorin kripë dhe piper mjaftueshëm kur gatuajnë”.
Tony Nassif, shef ekzekutiv te Mile End
“Një gabim i madh është të harrosh t’i hedhësh uthull ushqimit. Nëse nuk doni uthull, duhet t’i hidhni limon, sidomos te mishi. Aciditeti e mbledh shijen”.
David Seigal, shef ekzekutiv dhe pronar te Cull & Pistol
“Gabimi më i madh kur gatuhet peshk është mostharja e lëkurës së peshkut para se të vendoset në tigan. Tharja e lëkurës heq lagështirën dhe e lejon atë të bëhet kërce pasi gatuhet”.
Ignacio Mattos, bashkëpronar dhe shef te Estela
“Ndërlikimi i gjërave. Njerëzit kanë tendencën t’i bëjnë gjërat më të vështira seç janë. Mundohuni të kini besim dhe të mos shtoni shumë gjëra. Gjithashtu, duhet të provoni gjatë gatimit atë që po gatuani. Nuk është masa dhe receta gjëja më e rëndësishme, por fakti nëse ju e pëlqeni apo jo atë që po bëni”.