Donald Trump është një hap më afër nominimit presidencial republikan pas një fitoreje masive ndaj Nikki Haley në Karolinën e Jugut. Ish-presidenti fitoi shtetin primar të kundërshtarit të tij me një diferencë prej 20 pikësh, fitorja e tij e katërt radhazi. Trump nuk e përmendi rivalin e tij teksa festoi, duke vënë në pah zgjedhjet e përgjithshme në nëntor.
“Ne do ta shikojmë Joe Biden drejt në sy,” u tha ai mbështetësve disa minuta pasi mediat amerikane e projektuan atë si fitues të shtunën mbrëma. “Ai po shkatërron vendin tonë – dhe ne do të themi ‘dil Xho, je pushuar nga puna”.
Trump lavdëroi “unitetin” e partisë së tij pas rezultatit të së shtunës, duke thënë: “Nuk ka pasur kurrë një frymë si kjo. Unë kurrë nuk e kam parë Partinë Republikane kaq të unifikuar”.
Kjo shënoi një ndryshim nga përgjigja e tij në zgjedhjet paraprake të muajit të kaluar në New Hampshire, ku ai u tërbua kundër zonjës Haley për “dhënien e një fjalimi sikur ajo fitoi”.
Zonja Haley, e cila dikur shërbeu si guvernatore popullore me dy mandate e Karolinës së Jugut, e përgëzoi kundërshtarin për fitoren në fjalimin e saj. Ajo u zotua të qëndrojë në garë, megjithatë, duke thënë se afërsisht 40% e votave që ajo mori “nuk ishte ndonjë grup i vogël”.
“Ka një numër të madh votuesish në zgjedhjet tona paraprake republikane që thonë se duan një alternativë,” tha ajo, duke theksuar se fushata e saj e vazhdueshme nuk kishte të bënte me ambiciet e saj politike. “Unë nuk po heq dorë nga kjo luftë kur shumica e amerikanëve nuk e miratojnë Donald Trumpin dhe Joe Bidenin”, shtoi ajo.
Fushata e Trump hodhi poshtë përpjekjet e vazhdueshme të zonjës Haley në një deklaratë të shtunën, duke deklaruar se “iluzionet po mjegullojnë gjykimin e saj dhe se ajo nuk jeton më në realitet”.Në ditët përpara votimit në Karolinën e Jugut, fushata e Trump parashikoi se ish-presidenti do të grumbullonte mjaft delegatë për të arritur zyrtarisht nominimin brenda muajit të ardhshëm.
Zonja Haley nuk ka një rrugë të qartë përpara – kundërshtari i saj ka një epërsi të madhe në numërimin e delegatëve dhe është shumë përpara në të gjitha garat e ardhshme.
E megjithatë, Haley është ende me këmbë në fushatë, në një pjesë të madhe, për shkak të kontributeve nga donatorët që kanë derdhur shuma të mëdha parash. Ky fluks parash ka vazhduar pavarësisht se ajo përballet me pikëpyetje të mëdha. Zonja Haley mblodhi 16.5 milionë dollarë vetëm në janar, thanë zyrtarët e fushatës. Ky ishte totali i saj më i madh mujor deri më tani, dhe shumë më tepër se numrat e zotit Trump
