Kompania amerikane e hapësirës Blue Origin lëshoi sot raketën e saj të madhe New Glenn për një mision të parë në hapësirë, duke shënuar një pikë kthese për kompaninë e themeluesit të Amazon, Jeff Bezos, teksa kërkon të arrijë hapin me rivalin SpaceX. Me një lartësi 98 metra i gjatë, sa një ndërtesë apartamentesh afërsisht 30-katëshe, New Glenn u ngrit me sukses rreth orës 02:03 (koha lokale, 08:03 me orën tonë) nga baza hapësinore Cape Canaveral në Florida, pavarësisht kushteve të motit që ishin jo shumë të përshtatshme.
Fluturimi i parë i kësaj rakete të fuqishme është pritur prej vitesh dhe është shtyrë vazhdimisht, ndërsa të hënën është anuluar në minutën e fundit për shkak të një problemi teknik.Nëse misioni shkon siç është planifikuar, New Glenn pritet të arrijë në orbitë, diçka që kompania hapësinore, e themeluar në vitin 2000 , do të arrijë për herë të parë.
“ Çdo gjë përtej kësaj është një bonus”, ka thënë tashmë David Lieb, president dhe CEO i Blue Origin.
Në bagazhin e ngarkesave të New Glenn është prototipi i parë i automjetit Blue Ring të Blue Origin, një anije kozmike e manovrueshme që kompania planifikon t’ia shesë Pentagonit dhe klientëve komercialë për satelitët e misioneve të sigurisë kombëtare dhe shërbimit.
Edhe pse kompania ka marrë turistët për disa minuta në hapësirë me raketën e saj New Shepard prej vitesh, ajo ende nuk ka bërë një fluturim të vetëm në orbitë. Me New Glenn, i cili është shumë më i fuqishëm, ajo aspiron të hyjë në një treg të ri, atë të hedhjes në orbitë të satelitëve komercialë dhe hapësinorë, por edhe të anijeve kozmike dhe astronautëve.
Ajo kërkon të konkurrojë me SpaceX, e cila është në pronësi të një tjetër miliarderi amerikan, Elon Musk, dhe aktualisht dominon tregun me raketat e saj Falcon 9 dhe Falcon Heavy, duke zhvilluar gjithashtu raketën më të madhe të ndërtuar ndonjëherë.
Ajo raketë, e quajtur Starship, është planifikuar gjithashtu të kryejë sot, nëse e lejojnë moti, fluturimin e saj të shtatë testues, i cili u shty dje, të mërkurën.
