Një 62-vjeçar afro-amerikan u lirua të martën nga një gjykatë në Misuri pasi 43 vitesh burg. Kevin Strickland u dënua në vitin 1979 me burgim të përjetshëm, për një vrasje të trefishtë.
“Nuk kishte asnjë provë dhe pavarësisht ai u dënua vetëm në bazë të dëshmisë së një gruaje,” tha gjykatësi James Wells në një deklaratë. Për më tepër, dy nga katër autorët e vërtetë të vrasjes deklaruan se Strickland nuk ishte i përfshirë në vrasje.
Prokurori i Përgjithshëm i Qarkut Jackson, i cili po kërkonte anulimin e dënimit, e mirëpriti vendimin.
“Më në fund, drejtësia u vendos për këtë njeri që vuajti kaq shumë nga ky dështim i drejtësisë,” tha Gene Peters Baker në një deklaratë.
Kevin Strickland i është shtuar listës së gjatë të amerikanëve të cilët janë dënuar gabimisht. Ai është një nga të dënuarit që qëndroi në burg për shumë dekada. Sipas të dhënave, rreth 2500 personat e liruar në 30 vitet e fundit kanë kaluar mesatarisht 13.9 vite në burg. Periudha më e gjatë ishte 47 vite e 2 muaj.
Kompensimi i viteve të humbura nuk ka qenë gjithmonë një detyrë e lehtë. Projekti Innocence Midwest , e cila është e përfshirë në rastin e Strickland është duke zhvilluar një fushatë online për mbledhjen e fondeve për të ndihmuar atë.
Strickland tha se pas lirimit të tij ai dëshiron të shkojë në varrin e nënës së tij, e cila vdiq këtë verë, dhe të shohë oqeanin për herë të parë.
