Përfshirja në listën e kandidatëve për deputetë në qarkun e Durrësit të Rezeart Tushës, një njeri me precedentë penale dhe i dëbuar nga Zvicra për trafik droge, ka trazuar jo vetëm politikën por dhe vetë PD.
Madje kryetari i Departamentit Politikes se Jashtme në Partinë Demokratike, njëherësh dhe kandidat i sigurtë për këtë parti në qarkun e Dibrës Kreshnik Çollaku ka sfiduar Lulzim Bashën dhe kryesuesin e listës së PD në Durrës Edi Paloka, se nëse do ishte ne njeriemri i Tushës në qarkun e Dibrës, do të tërhiqej nga gara.
“Në rast se në listën ku unë kandidoj, del një njeri me të tilla probleme, me rekorde kriminale, unë tërhiqem. Dhe jam kandidat i Partisë Demokratike sot!
Ky është një standart që duhet mbajtur dhe nga ne dhe nga ju”, ka deklaruar Çollaku në emisionin “BardheZi”.
Rezart Tusha për të cilin bëhet fjalë, është renditur i 8-i në listën e PD në Durrës dhe rezulton të jetë në person problematik me ligjin.
Tusha është arrestuar në Zvicër më 18 shtator të vitit 1994 nga policia e Gjenevës në operacionin e koduar me emrin “Hydra” sepse kishte në posedim drogë heroinë.
Në dokumentin e zyrës federale për migracionin thuhet se gjatë marrjes në pyetje Rezeart Tusha ka pranuar se trafikonte narkotikë për të siguruar të ardhura dhe se ka kaluar edhe më parë qese me heroinë.
Për këtë arsye ai është ndaluar të hyjë në Zvicër prej 5 vitesh. Gjithashtu Rezart Tusha është shkarkuar në vitin 2013 si drejtor i Burgut të Rrogozhinës dhe i kallëzuar penalisht, me akuzën se u jepte leje të paligjshme të dënuarve.(TemA)
