Shtetet e Bashkuara kanë mirëpritur njoftimin e Serbisë për t’u tërhequr nga kufiri me Kosovën, pas paralajmërimeve të Uashingtonit, edhe pse verifikimi i lëvizjes së trupave është i pamundur.
“Ne kemi parë raportimet se Serbia ka tërhequr personelin dhe pajisjet ushtarake nga kufiri, por na duhet ende ta verifikojmë këtë në mënyrë të pavarur dhe do të kërkojmë konfirmim të mëtejshëm. Por nëse është e vërtetë, ne e mirëpresim. Është diçka që e kërkuam javën e kaluar dhe është një hap që e vleerësojmë”, deklaroi Mattheë Miller, zëdhënës i Departamentit amerikan të Shtetit.
Ishte shefi i shtabit të ushtrisë serbe, gjeneral Milan Mojsiloviç që deklaroi se Beogradi kishte reduktuar praninë e trupave në Kosovë.
“Më 25 shtator, numri i personelit ushtarak ishte 8.530 jo vetëm për të siguruar vijën administrative në zonën tokësore, por edhe sa i takon njësive që vendosen rutinë në afërsi të vijës kufitare”, deklaroi Mojsiloviç.
Mojsiloviç dhe ministri serb i Mbrojtjes, Milos Vuçeviç mohuan akuzat e qeverisë së Kosovës se ushtria serbe kishte stërvitur grupin prej 30 personash të përfshirë në shkëmbimin e zjarrit në fshatin Banjskë, ku mbeti i vrarë një oficer i Policisë së Kosovës.
