Më 26 korrik, Senati Amerikan ka miratuar marrëveshjen për ekstradim me Republikën e Kosovës, e cila ishte nënshkruar nga presidentja Atifete Jahjaga, më 29 mars të vitit 2016, dhe nga ambasadori Greg Delawie
Sipas Gazetës Express kjo marrëveshje shfuqizon marrëveshjen e mëhershme të nënshkruar nga SHBA-ja dhe qeveria e Mbretërisë së Serbisë, në vitin 1901. Deri sot, janë së paku tre persona të cilët janë kërkuar nga autoritetet amerikane për ekstradim.
Njëri prej tyre është edhe Bajram Asllani, i kërkuar nga FBI-ja, për veprën penale “ofrim të përkrahjes materiale për terroristët”.
Presidentja Atifete Jahjaga, pas nënshkrimit me ambasadorin Greg Delawie, kishte thënë se nënshkrimi i kësaj marrëveshjeje thellon marrëdhëniet me SHBA-në por edhe “nënvizon përcaktimin e Kosovës për sundim të rendit dhe ligjit në Kosovë dhe për bashkëpunim të parezervë me partnerët”.
“Deri më tani, përkundër bashkëpunimit të ngushtë me autoritetet amerikane në fushën e sigurisë, mungesa e kësaj marrëveshjeje të ekstradimit ka qenë pengesë ligjore për përmbyllje të suksesshme të rasteve”, thuhej në njoftimin e Presidencës në mars të vitit 2016.
“Me këtë marrëveshje të nënshkruar sot, Kosova dhe SHBA-ja, dy shtetet garantojnë që kriminelët që paraqesin rrezik për rendin dhe sigurinë e qytetarëve të vendeve tona do të ndiqen dhe do të vihen para drejtësisë”, kishte thënë Jahjaga në ceremoninë e nënshkrimit të marrëveshjes.
