Mbarimi i pushimeve të verës na paralajmëron se është koha për një rifreskim të gardërobës. Tashmë nuk është sekret fakti që me aksesorët dhe veshjet e duhura mund ta transformosh paraqitjen tënde, ndaj dhe nëse ti ke këtë qëllim, ne jemi këtu për të të ndihmuar.
Çdo javë “iconstyle.al” do të sjellë një rubrikë të veçantë me këshilla që blogeret më të njohura shqiptare do të japin për lexuesit tanë. Vajzat e famshme të Instagramit do të na tregojnë trendet e vjeshtës duke sugjeruar 3 aksesorët apo veshjet “must” dhe si mund t’i kombinojmë ato.
Rubrikën do të nisim me këshillat e një prej influencuesve më të mëdha sa i përket stilit dhe modës. Armina Mevlani tregoi “sekretet” e gardërobës së saj për “iconstyle.al”, duke sjellë 3 akesorët e saj të preferuar për stinën e vjeshtës, që do t’i shihni kudo këtë sezon.
1.Çizmet “Chloe”
Më në fund erdhi koha e rehatisë! Këto çizmet e preferuara të Armina Mevlanit janë kaq praktike dhe me stil. Ngjyra e tyre e zezë i bën lehtësisht të kombinueshme. Gjatësia rreth kyçit ofron mundësinë e veshjes me fustane dhe taka e ulët dhe e plotë i bën aleate të përditshmërisë.
2.Syzet “Celine”
Fakti që dielli nuk do të jetë aq i fortë sa në muajt e verës nuk do të thotë se duhet t’i harrojmë syzet.
Aksesori i radhës që do të jetë patjetër në dollapin e Armina Mevlanit, janë këto syze “Celine” me kënd që i japin hijeshi pamjes suaj.
Këto syze moderne të vitit 2018, do të jenë shoqëruesi juaj edhe nëse vishni një xhaketë të lehtë vjeshte, apo dhe një pardesy.
3.Çanta “Fendi”
U mërzitët me çantat e shpinës apo ato në brez që i pamë gjerësisht në verë? Epo bëhuni gati për një nga modelet më me stil të vjeshtës, çanta në formë shporte e “Fendi”-t.
Kjo çantë lëkure kaq praktike, është lehtësisht e kombinueshme me veshje sportive dhe casual.
Ngjyra e saj neutrale e bën edhe më të lehtë kombinimin me të bardhën, kafen, të zezën dhe ngjyrat e ndezura si e gjelbra dhe portokallia.
