Ka zgjatur pak minuta seanca e jashtëzakonshme plenare për votimin e dekreteve të Presidentit Ilir Meta për shkarkimin e 6 ministrave dhe zëvendëskryeministres, si edhe për emërimin e 7 ministrave dhe zëvendëskryeministrin.
Në seancë, sipas urdhrit të kryeparlamentarit Gramoz, ishte parashikuar vetëm votimi i dekreteve. Opozita ka kërkuar me kryetarët e grupeve Spaho dhe Vasili, debat në lidhje me dekretet, ndërsa Taulant Balla, kreu i deputetëve socialistë u shpreh se rregullorja e parlamentit e parashikon ndryshe.
Kryetari i parlamentit Gramoz Ruçi ka vendosur që vetëm të procedohet me votimin e dekreteve dhe të mos ketë debat. Pas vendimit, deputetë të opozitës janë shprehur kundër dhe kanë lënë karriget e tyre duke u vendosur para foltores. Ndërkohë, forcat e sigurisë në parlament kanë qenë në gadishmëri për të ndërhyrë.
Ish-kryeministri Sali Berisha ka shkuar te foltorja e Kuvendit dhe nisi të flasë pa mikrofon. Më pas, deputetë të opozitës braktisën seancën.
Ndërkohë deputetë të mazhorancës votuan dekretet e presidentit.
Ndryshimet që u votuan
Ikën Arben Ahmetaj, vjen Anila Denaj
Ikën Damian Gjiknuri, vjen Belinda Balluku
Ikën Mirela Kumbaro, vjen Elva Margariti
Ikën Lindita Nikolla, vjen Besa Shahini
Ikën Sonila Qato, vjen Eduard Shalsi
Ikën Niko Peleshi, vjen Bledi Çuçi
Ikën Senida Mesi, vjen Erion Braçe
