Saranda po njeh kulmin e sezonit turistik këto ditë te fundit te gushtit. Turistët flasin për kosto normale të shërbimeve në qytet, e ndërsa për vendasit nuk është e njëjta, sipas tyre Saranda ka kosto shumë të larta jetese, shërbimet ofrohen me çmime turistike.
Max ka qenë për disa ditë në Sarandë dhe është duke larguar prej portit të Sarandës.
“Çdo gjë ishte shumë mirë, njerëzit, çmimet, mikpritja. Çmimet janë fare të lira krahasuar me Holandën dhe shumë më të lira se në Korfuz. E vetmja gjë që vura re ishte se ushqimi ishte i mirë por gjithandej i njëjti ushqim. Nuk gjeje oferta për shije të ndryshme”, u shpreh një turist nga Holanda.
Një çift italian që e viziton Shqipërinë për herë të parë thonë se çdo gjë ishte normale në Sarandë.
“Ne erdhëm për të pushuar dhe na pëlqeu. Çmimet ishin të leverdishme dhe shumë më të lira se vendet fqinje. Çdo gjë qetë. Asgjë nuk na shqetësoi”, deklaroi një çift nga Italia.
Ndërsa vendasit e shohin turizmin në rritje, por çmimet shumë të larta për nivelin e jetesës lokale.
Për kreun e operatorëve turistikë dhe bizneseve të turizmit z. Arben Çipa situata nuk është edhe aq optimiste krahasuar me një vit më parë.
3.3 milionë turistë, shumica nga Kosova, Maqedonia e Veriut dhe emigrantët
Shqipëria u vizitua nga nga 3.3 milionë turistë të huaj në 7 muajt e parë të vitit.
Të dhënat janë bërë publike nga instituti i statistikave, i cili raportoi se numri i të huajve për këto 7 muaj është rritur me 12.4 për qind krahasuar me një vit më parë.
Por nga vijnë më së shumti të huajt që zgjedhin Shqipërinë për të bërë pushime?
Sipas INSTAT, në vendin e parë qëndrojnë kosovarët. Në 7 muajt e parë të vitit, Shqipëria u vizitua nga 1 milionë e 57 mijë kosovarë me një rritje prej 13.7 për qind krahasuar me 7 mujorin e vitit të kaluar.
Pas shqiptarëve të Kosovës, në vendin e dytë renditen shtetasit nga Maqedonia e Veriut. Për janar korrik të këtij viti, rezultojnë mbi 372 mijë turistë nga Maqedonia e veriut që kanë vizituar Shqipërinë me një rritje prej 3.4 për qind vit me vit.
Më pas në listë vijnë grekët, malazezët, anglezët dhe italianët, hyrjet e të cilëve për këtë vit variojnë nga 159 mijë deri në 311 mijë pushues.
Shumica e vendeve që kanë fluksin më të madh të turistëve në Shqipëri janë ato me numrin më të madh të emigrantë e shqiptarë. Kjo do të thotë se një pjesë e madhe e turistëve që raportohen si të huaj janë shtetas shqiptarë, të pajisur me dokumentet e vendeve ku kanë emigruar.
Kriza politike e kësaj vere, e cila kulmoi me mbajtjen e zgjedhjeve të njëanshme pa opozitën në fund të qershorit pati krijuar shqetësim për dekurajimin e turistëve të huaj. Por të dhënat e raportuar nga INSTAT, tregojnë se fluksi i pushuesve nga jashtë ka vazhduar të rritet me ritme dyshifrore.