Presidenti i Këshillit Evropian, Charles Michel ka marrë një dhuratë nga kryeministri i Shqipërisë, Edi Rama.
Në tavolinën e tij, ka gjetur një zile, të cilës i ka rënë disa herë për të vendosur rregull në mbledhje.
Pasi i ka rënë disa herë, ka qeshur ndërsa kryeministri Edi Rama e ka ndjekur me sy gjatë gjithë kohës.
Ndërkohë kujtojmë se është duke u zhvilluar ditën e sotme në Tiranë Samiti i Bashkimit Europian më Ballkanin Perëndimor, teksa nga ana tjetër pritet që të organizohet gjithashtu edhe protesta e thirruar nga Partia Demokratike.
Bëjmë me dije se kryeqyteti është mobilizuar dhe blinduar nga forcat e policisë teksa në patrullim janë dhe helikopterët në perimetrin e sigurisë.
Nga ana tjetër duket se opozita nuk tërhiqet nga vendimi për të zhvilluar protestën vetëm pak metra larg vendit ku liderët e Europës dhe Ballkanit Perëndimor janë duke mbajtur mbledhjen e tyre të rëndësishme.
Kujtojmë se ky samit është një organizim historik për Tiranën dhe Shqipërinë.
Në këtë samit, pritet të jenë të pranishëm 27 liderë evropianë, shoqëruar nga delegacionet përkatëse.
