Kim Jong-un takoi presidentin e Koresë së Jugut Moon Jae-in në kufi: samiti historik u zhvillua në Panmunjom dhe të dy shtrënguan duart disa herë. I shkurtër por një takim jashtë programi domethënës me Moon, i cili shkoi për disa sekonda në Veri me ftesë të liderit Kim Jong-un. Kim është udhëheqësi i parë në fuqi i familjes, që shkel në territorin jugkorean.
KIM: NJË HISTORI E RE FILLON TANI
“Një histori e re fillon tani”, është mesazhi i liderit të Koresë së Veriut Kim Jong-un në librin e vizitorëve në Shtëpinë e Paqes, një ndërtesë trekatëshe në pjesën jugore të fshatit kufitar Panmunjom ku u zhvillua takimi.
Kim Jong-un bëri thirrje për biseda “të sinqerta” për çështjet e gadishullit, “jo për të humbur kohë dhe mundësi” për të marrë “rezultate të mira”. Në tryezën e bisedimeve ishte prezentë edhe motra e Kim, Kim Yo-jong duke marrë shënime. Nga ana e tij, Moon kujtoi se “bota i ka sytë në Panmunjom”, e cila është bërë ” simbol i paqes dhe jo i ndarjes” falë vizitës së Kim.
MOON KALON KUFIRIN E VERIUT DHE KTHEHET NË JUG ME KIM
Pak para fillimit të bisedimeve, u zhvillua një takim domethënës jashtë programit me Presidentin e Koresë së Jugut, që vendos këmbët në Korenë e Veriut. Kim arriti në vijën e demarkacionit ushtarak nga një ndërtesë e afërt duke pasur në krahë punonjësit e tij kyçë.
Me veshjen tradicionale të errët të stilit “Mao”, lideri koreano-verior eci në korridorin e ngushtë që ndante dy ndërtesat e takimit, të njohura si T2 dhe T3, në Zonën e Përbashkët të Sigurisë (JSA).
Moon e priti Kim duke buzëqeshur në rripin e çimentuar që shënjon kufirin. Dy liderët shkëmbyen shtrëngimin historik të dorës rreth orës 9:30 me orën lokale (2:30 në Shqipëri), duke fiksuar në aparate momentin e pavdekshëm të ngjarjes.
Kim, çuditërisht, më pas kërkoi që Moon të kalonte përsëri kufirin, gjë që u bë duke u mbajtur për dore. Disa sekonda më pas, të dy u kthyen në Jug në qilimin e kuq, pas roja presidenciale e Koresë së Jugut me kostum tradicional. Pas arritjes në Shtëpinë e Paqes, ku u mbajt ceremonia e mirëpritjes, të dy udhëheqësit kaluan rojet e nderit dhe paraqitën delegacionet e tyre përkatëse, raporton BW.
KIM KËRKON FOTO GRUPI
Pritja e Koresë së Jugut e rezervuar për Kim Jong-un ishte ajo specifike për liderët e huaj në një vizitë shtetërore, me shumë nderime. Kim, ndërsa mbërrinte në Shtëpinë e Paqes, duket se theu për së dyti protokollin në bazë të imazheve televizive të drejtpërdrejta: udhëheqësi sugjeroi një foto grupi me Moon dhe delegacionet përkatëse.
Në delegacionin e Koresë së Veriut, përfshihen ndër të tjera Kim Yong-nam, kreu i ceremonialit dhe shefi i shtetit de facto dhe motra e vogël e udhëheqësit Kim Yo-jong, e cila pati një përshëndetje miqësore me shkëmbimin e pak fjalëve dhe një buzëqeshjeje me Moon, me të cilin u takua në shkurt në vizitën që pati në Korenë e Jugut për pjesëmarrjen në ceremoninë e hapjes së Lojërave Olimpike të PyeongChang. Me këtë rast, Kim i reja, si e dërguar e veçantë e vëllait të saj, i dorëzooi Moon një letër personale dhe një ftesë për të vizituar Pyongyang sa më shpejt të ishte e mundur.
RAUNDI I PARË I BISEDIMEVE ZGJATI DY ORË
Raundi i parë i bisedimeve midis Presidentit të Koresë së Jugut, Moon Jae-in dhe udhëheqësit të Koresë së Veriut, Kim Jong-un, u përmbyll në Shtëpinë e Paqes në Panmunjom pas rreth dy orësh. Të dy udhëheqësit nuk kanë ngrënë drekë së bashku. Kim u kthye në Veri dhe pasdite do të shkojë sërish në jug për aktivitete të tjera që synojnë forcimin e besimit të ndërsjellë, duke përfshirë një shëtitje. Pas bisedimeve të reja, nënshkrimi i deklaratës së përbashkët dhe darka përfundimtare e ofruar nga Moon.
