Të lodhur nga koronavirusi, pagat e ngecura, korrupsioni i pakontrolluar, rusët filluan të votojnë të premten në zgjedhjet parlamentare.
Të 450 ulëset e Dhomës së Ulët të Parlamentit, që njihet si Duma e Shtetit, janë në garë. Zgjedhjet do të zgjasin tri ditë, deri më 19 shtator. Sipas zyrtarëve zgjedhorë, ky vendim është marrë për shkak të pandemisë së koronavirusit, por aktivistët e opozitës dhe disa ligjvënës liberalë thonë se masa është përpjekje e Kremlinit për të manipuluar pjesëmarrjen dhe për të sajuar një fitore të besueshme të partisë në pushtet, Rusia e Bashkuar, shkruan Radio Europa e Lirë.
Autoritetet gjithashtu kanë bllokuar nismën Votimi i Zgjuar, e cila mbështetet nga udhëheqësi i burgosur i opozitës, Aleksei Navalny. “Është regjimi rus, dhe jo publiku, ai që ka nevojë për zgjedhje”, ka thënë Andrei Kolesnikov, analist në Qendrën Carnegie të Moskës, në një koment në internet.
Sondazhet parazgjedhore nga Qendra e pavarur Levada kanë treguar se shumica e rusëve janë të pakënaqur me mënyrën se si funksionon Duma. Sondazhet kanë treguar probleme edhe më të thella me Rusinë e Bashkuar, parti që e quan veten të pavarur, por që në fakt është e lidhur ngushtë me udhëzimet nga Kremlini dhe administrata e fuqishme presidenciale.
Rusia e Bashkuar ka shumicën në Dumën e Shtetit, por popullariteti i saj është aktualisht më i ulëti në gati dy dekadat e ekzistencës së saj. Edhe sondazhi shtetëror VTsIOM ka zbuluar se mbështetja për Rusinë e Bashkuar sillet në rreth 29 për qind.
Për dallim, presidenti rus, Vladimir Putin, i cili nuk është anëtar i partisë, ruan popullaritet të gjerë dhe nuk ka rival të mirëfilltë politik. Megjithatë, popullariteti i tij ka rënë viteve të fundit, pjesërisht për shkak të reformës së përgjithshme të pensioneve, të miratuar pas rizgjedhjes së tij në vitin 2018, dhe perceptimeve për nivele të larta të korrupsionit në Qeveri. Pagat kanë ngecur për një pjesë të madhe të popullsisë, ndërsa ekonomia lufton me sanksionet ekonomike nga Perëndimi, taksat e larta dhe inflacionin në rritje.
“Llogaris në pozicionin tuaj qytetar, të përgjegjshëm, të ekuilibruar dhe patriotik”, ka thënë Putin në një video-adresim, të publikuar në ueb-faqen e Kremlinit në prag të votimeve.
Përveç Rusisë së Bashkuar, edhe tri parti të tjera kanë aktualisht ulëse në Dumën e Shtetit. Më e fuqishmja është Partia Komuniste. Dy të tjerat janë: Partia Liberale Demokratike e Rusisë dhe partia Një Rusi e Drejtë. Të tria thonë se janë në kundërshtim me Rusinë e Bashkuar, por, në realitet, ato rrallë votojnë kundër iniciativave të shumicës ose atyre që lobon në mënyrë eksplicite Kremlini.
Vlerësimet e dobëta në sondazhe për Rusinë e Bashkuar paraqesin sfidë për këshilltarët e politikës së brendshme të Kremlinit, të cilët kanë frikë se partia mund të humbasë shumicën. Humbja e shumicës së madhe mund ta bëjë më të vështirë për Dumën që të kalojë legjislacione të mëdha, të tilla si ndryshimet kushtetuese.
Kjo do t’i komplikonte potencialisht zgjedhjet presidenciale të vitit 2024, kur mandati aktual i Putinit është i planifikuar të përfundojë. Vitin e kaluar, Duma ka miratuar ndryshime kushtetuese që i hapin derë Putinit të qëndrojë në pushtet përtej vitit 2024, por ai nuk ka treguar nëse do ta bëjë një gjë të tillë.
Ndërsa The Guardian shkruan se “partia në pushtet Rusia e Bashkuar ka të ngjarë të gjejë një mënyrë për të mbajtur një kontroll të mbajë nën kontrollin e saj ndaj Dumës Shtetërore. Ndërsa mbyt opozitën politike dhe mediat e pavarura, Kremlini po përpiqet të zgjidhë një problem të thjeshtë matematikor: si mund të përforcojë numrat e Rusisë së Bashkuar, e cila po prek nivelet më të ulëta historike, pa provokuar llojin e protestave që shpërthyen gjatë incidente të mashtrimit të papërpunuar të votuesve në 2011. Para votimit, i cili do të mbahet për tre ditë, ka pasur një mbështetje në rritje për Partinë Komuniste, ndërsa opozita tjetër pas Alexei Navalny, kritiku i burgosur i Kremlinit, ka kërkuar të konsolidohet përmes një përpjekjeje “votimi të zgjuar” që identifikon kryesisht kandidatët komunistë si sfiduesit më të fortë”.