Qeveria ruse po dëbon 23 diplomatë britanikë dhe ka kërcënuar se do të marrë masa të tjera në shenjë hakmarrjeje, përderisa vazhdon përplasja diplomatike rreth përdorimit të një agjenti nervor mbi një ish spiun rus në Britani.
Ministria e Jashtme ruse tha në një deklaratë se ka urdhëruar mbylljen e Këshillit Britanik në Rusi dhe ka anuluar marrëveshjen për rihapjen e konsullatës britanike në në Shën Peterburg.
Ajo ka urdhëruar diplomatët të largohen brenda një jave.
Ministria e Jashtme ruse thirri ambasadorin britanik në Rusi të shtunën para se ta bënte publikimin.
Në komunikatë thuhet se qeveria mund të ndërmarrë edhe masa të tera nëse Britanike ndërmerr lëvizje të tjera “jomiqësore” ndaj Rusisë.
Kryeministrja britanike, Theresa May, dëboi këtë javë 23 diplomatë rusë dhe shkëputi kontaktet e larta pas helmimit të ish spiunit rus Sergei Skripal dhe të bijës së tij Yulia. Të dy ata janë në gjendje të rëndë në spital.
Sekretari i Jashtëm britanik, akuzoi presidentin rus, Vladimir Putin, se ka urdhëruar personalisht helmimin e Skripalëve, që janë në gjendje të rëndë pas sumit më 4 mars. Zëdhënësi i Putinit hodhi poshtë pohimet.
Rusia ka mohuar fuqishëm përfshirjen në sulm, por fuqitë perëndimore e shohin atë si dëshminë më të fundit të ndërhyrjes së supozuar ruse jashtë vendit. Tensionet kërcënojnë të lënë nën hije rizgjedhjen e pritur të Putinit të dielën për një mandat të ri gjashtëvjeçar presidencial.
Shefat e diplomacisë së Bashkimit Evropian pritet të diskutojnë të hënën për këtë çështje mes thirrjeve për bojkotimin e Kampionatit Botëror të Futbollit në Rusi. Kryeministrja britanike po kërkon një koalicion global për të dënuar Moskën.
