‘Luftë’ mes dy superfuqive botërore edhe për mediat. Ministria ruse e Drejtësisë ka dërguar letra në nëntë media për regjistrimin e tyre të mundshëm si agjentë të huaj. Zëri i Amerikës dhe Radio Evropa e Lirë janë mes atyre që mund të njihen si agjentë të huaj, tha ministria.
Ministria gjithashtu i dërgoi letra administratës së faqeve të internetit në Kaukaz, Siberi dhe Krime si Kavkaz.Realii, Krym Realii dhe Sibir Realii, si dhe Radio Azatliq – të gjitha këto janë degë të Radio Evropa e Lirë në Rusi. Kanali televiziv “Koha aktuale”, një projekt i përbashkët i Zërit të Amerikës dhe Radios Evropa e Lirë si dhe ueb faqja factograph.info në pronësi të Radio Liberty dhe projekti IdelRealii, morën gjithashtu letra, raporton “BalkanWeb”.
Të mërkurën, Duma e shtetit rus miratoi raportin e tretë dhe të fundit të projekt-ligjit, i cili kërkon që mass-mediat që veprojnë në vend, por financohen nga jashtë të regjistrohen si agjentë të huaj. Projektligji është një kundërërgjigje e kërkesës së Uashingtonit për Russia Today për t’u regjistruar si agjent i huaj.
Mediat që refuzojnë të regjistrohen si agjentë të huaj mund të përballen me sanksione të ngjashme me ato të zbatuara në rastin e OJQ-ve dhe grupeve të tjera të cilat aktualisht rregullohen nga ligji origjinal i agjentëve të huaj. “Voice of America” (Zëri i Amerikës) dhe “Evropa e lirë”, financohen nga Kongresi amerikan.
“Çdo përpjekje për të sulmuar lirinë e mediave ruse jashtë vendit nuk do të mbeten pa një denoncim të vendosur dhe një reagim nga Moska. Projektligji i miratuar do të bëjë të mundur shprehjen e reagimit tonë në kohën e duhur”, tha sekretari i shtypit i Vladimir Putinit, Dmitri Peskov pas miratimit të ligjit.
Në shtator, Departamenti Amerikan i Drejtësisë (Department of Justice) kërkoi që Russia Today në SHBA të regjistrohej në Aktin e Regjistrimit të Agjentëve të Huaj (FARA) përpara 13 nëntorit. Administrata amerikane kërcënoi të ngrinte asetet e kompanisë nëse nuk regjistrohej si e tillë.
Duke komentuar projekt-ligjin, kryeredaktori i RT-së ofroi ‘ngushëllimet’ të mërkurën për të gjithë gazetarët “në të gjitha organizatat mediatike, ruse dhe të huaja, të cilët janë kapur në lojërat politike të Uashingtonit”.
Radioja “Evropa e lirë” kishte dënuar më parë këtë ligj duke theksuar se po përballej tashmë me kufizime më të mëdha në Rusi se ato të raportuara nga RT në SHBA. Ligji rus u kritikua nga Berlini dhe OJQ-ja “Amnesty international”.