Presidenti i Turqisë, Recep Tayyip Erdoğan, në një bisedë telefonike diskutoi marrëdhëniet dypalëshe dhe zhvillimet rajonale me homologun e tij amerikan Donald Trump, veçanërisht zhvillimet në lidhje me Mesdheun Lindor.
Drejtoria e Komunikimeve e Turqisë njoftoi se presidenti Erdoğan i kujtoi Trumpit se Turqia nuk është një palë që krijon paqëndrueshmëri në Mesdheun Lindor.
Ai theksoi se Turqia vërtetoi me “veprime konkrete” se dëshiron të zvogëlojë tensionet dhe të krijojë dialog për këtë çështje.
Greqia ka kundërshtuar eksplorimin aktual të Turqisë për energji në Mesdheun Lindor, duke u përpjekur të godasë territorin detar turk të bazuar në ishujt e vegjël afër bregdetit turk.
Turqia, vendi me vijën më të gjatë bregdetare në Mesdhe, ka dërguar anije të shpimit për të eksploruar energji në ndarjen e saj kontinentale, duke theksuar se Turqia dhe Republika Turke e Qipros Veriore (TRNC) kanë të drejta në rajon.
Zyrtarët turq thonë se dialogu mbi ndarjen e drejtë të këtyre burimeve do të jetë fitimprurës për të gjitha palët.
Turqia dhe Greqia duhet të angazhohen për dialog
Zv/sekretari për media i Shtëpisë së Bardhë, Judd Deere, gjithashtu foli për telefonatën e Trump me Erdoğan.
“Presidenti Trump riafirmoi që Greqia dhe Turqia duhet të angazhohen për dialog, që është rruga e vetme për zgjidhjen e dallimeve mes tyre. Të dy udhëheqësit diskutuan gjithashtu çështje të rëndësishme dypalëshe dhe rajonale”, shkroi ai në rrjetet sociale.
Përpos kësaj, Deere gjithashtu tha se Trump zhvilloi bisedë telefonike edhe me kryeministrin grek Kyriakos Mitsotakis dhe diskutoi çështjet dypalëshe dhe rajonale.
Ai tha se Trump “shprehu shqetësimin” për rritjen e tensioneve midis aleatëve të NATO-s në Mesdheun Lindor, Turqisë dhe Greqisë.
