Lideri i opozitës deklaroi se zgjidhja e krizës janë zgjedhjet e parakohshme, por me qeveri tranzitore pa Edi Ramën kryeministër.
Në takimin me demokratët e Lezhës, kreu i opozitës identifikoi Edi Ramën si problemin më të madh për ekonominë, papunësinë dhe shkatërrimin e drejtësisë. Lideri i opozitës deklaroi se zgjidhja e krizës janë zgjedhjet e parakohshme, por me qeveri tranzitore pa Edi Ramën kryeministër. “30 qershori, në këtë pikëpamje vetëm ka përforcuar dhe konfirmuar si të drejta shqetësimet dhe rrugëdaljet nga kriza që kemi parashtruar: një qeveri tranzitore pa Edi Ramën, çuarjen para drejtësisë të të gjithë politikanëve dhe kriminelëve, të faktuar para të gjithë botës si hajdutët e zgjedhjeve, dhe zgjedhje të parakohshme“.
Duke iu referuar vendimit të gjykatës së Durrësit që i dha mandatin kryetares së bashkisë pas kërkesës së dytë të bërë nga PS-ja, Basha u shpreh se Edi Rama ka privatizuar drejtësinë. “Kjo tregon se drejtësia është tërësisht e privatizuar nga Edi Rama. 3 vjet pas miratimit të reformës në drejtësi, drejtësia është tërësisht e kapur nga Rama. Kjo është arsyeja pse drejtësia nuk funksionon. Edi Rama është kryeministri më hajdut, më arrogant, dhe më mashtrues më historinë e Shqipërisë. Paratë tuaja, paratë e shqiptarëve po i vjedh Edi Rama me familjen dhe miqtë e tij. Pasurohen të pushtetshmit dhe të pasurit, varfërohen njerëzit e thjeshtë dhe të pambrojtur. Nëse shqiptarët nuk kanë të hanë është sepse paratë e tyre i ka vjedhur Edi Rama. Miliarda euro janë vjedhur, abuzuar dhe shpërdoruar këto 6 vjet, të gjitha kanë përfunduar në xhepat e Ramës dhe janë shpërdoruar për tekat e Ramës në luks dhe fasada” theksoi kryedemokrati.
Në njoftimin e shpërndarë për mediat nga zyra e shtypit të PD-së, lideri demokrati e ka cilësuar si kusari, papunësi dhe vrasje të shpresës koncesionin Milot Balldren, që kaloi të enjten në Kuvend. “Nëse shqiptarët janë pa punë, është sepse ekonominë, paratë dhe mundësitë ekonomike i kanë marrë oligarkët dhe klientët e Ramës. Nëse shqiptarët nuk kanë shpresa është sepse shpresat e tyre i ka vrarë Rama me oligarkët hajdutë, siç po bën edhe këtu në Lezhë me kusarinë Milot Balldren. Edi Rama është artist i mashtrimit. Çdo gjë që ka premtuar, cdo gjë që ka thënë, ka qenë mashtrim me qëllim për të vjedhur. Çdo projekt, program dhe politikë është mashtrim për shqiptarët në shërbim të oligarkëve”.
