Pas reshjeve të shiut gjatë natës, në bashkinë Shkodër ka probleme vetëm në rrugën e Prekalit. Gazetari Simon Shkreli raporton se problematike është vetëm segmenti rrugor Mes-Ura e Shtrenjtë. Aktualisht, qarkullimi është i pamundur në këtë segment për shkak të rrëshqitjeve të gurëve dhe dherave.
Firma kontraktuese pritet të ndërhyjë për pastrimin e saj. Nuk paraqiten problematika në akse të tjera. Sakaq, theksojmë se një ditë më parë Agjencia e Mbrojtjes Civile në Ministrinë e Mbrojtjes kërkoi nga autoritetet vendore rritjen e gatishmërisë së strukturave të Mbrojtjes Civile.
Njoftimi i MB:
Në qarqet Shkodër, Kukës, Dibër dhe Lezhë mund të ketë vërshime të shpejta të lumenjve të vegjël malorë dhe rrëshqitje të dherave. Në zonat urbane, në këto qarqe mund të shfaqen probleme me përmbytje të lokalizuara, në varësi të gjendjes së kanalizimeve. Këto fenomene pritet të shoqërohen me shtrëngata në qarqet Shkodër, Kukës, Dibër, Lezhë, Elbasan, Vlorë dhe Gjirokastër.
Në zonën e Alpeve parashikohen reshje tepër të dendura dëbore në formën e stuhive të dëborës. Ndërsa në zonat malore në lartësinë mbi 800-900 metra reshje dëbore me intensitet të ulët.
Ndaj, bazuar në këto parashikimi, Agjencia e Mbrojtjes Civile në Ministrinë e Mbrojtjes kërkon nga autoritetet vendore rritjen e gatishmërisë së strukturave të sistemit të Mbrojtjes Civile që kanë në administrim: hidrovoret, rezervuarët, infrastrukturën rrugore, furnizimin me energji elektrike, furnizimin me ujë, monitorimin e nivelit të lumenjve dhe çdo strukturë tjetër që është në funksion të menaxhimit të emergjencave civile.
