Moderatroja Alketa Vejsiu ka rrëfyer mbrëmjen e sotme disa nga peripecitë që e çuan atë deri në prezantimin e Sanremos. E ftuar në emisionin Opinion, Alketa ka treguar se fillimisht iu ka dërguar email shumë prezantuesve italianë, mes tyre Maria De Filippit dhe Lucio Prestas.
“Bëra një email shumë të mirë dhe ia dërgova disa personazhve në Itali, dhe Maria De Filippit. Ata na kthyen përgjigje dhe na lanë në pritje për disa kohë për takimin. Vendosëm dhe takimin por ai nuk u bë kurrë për disa arsye.
Ia dërgova email prezantuesve italianë. Bëra një telefonat me asistenten e Lucio Prestas dhe rezultoi se ishte shqiptare, e lindur në Itali dhe e rritur atje. Me origjinë nga nëna në Shqipëri dhe babain nga Kalabria. Më erdhi një mesazh nga Presta dhe u takuam në mars të dy viteve më parë. Nuk i kërkova gjë, i thash vetëm kush isha dhe e ftova në Shqipëri të shikonte produksionet e mia”, u shpreh ajo.
Më tej, ajo tregoi sesi agjencia e Lucio Prestës e prezantoi me Amadeusin, dhe në këtë 70 vjetor të Sanremos sipas saj, ishte fat që prezantues ishte pikërisht Amadeusi.
“Unë këtu në Shqipëri kam marrë aq sa doja të merrja, më shumë se ç’mund të marrësh. Me ndihmën e agjencisë së Prestës sollëm pak Itali në Shqipëri. Me produksione të reja. Ai erdhi në Klan dhe pa sa bukur ne realizojmë produksionet tona. Ai më prezantoi me Amadeusin dhe për fat në këtë 70 vjetor të Sanremos qëlloi që prezantonte Amadeusi.
Iu thash ka mundësi të bëj unë ndonjë prezantim në Itali. Më thanë Italia është pak e vështirë, pse do të vish ti këtu. Iu thash kam një monolog timin.
10-15 ditë pas ditëlindjes sime vitin e kaluar më thanë që është e pamundur. Pas kësaj, për rreth një muaj një herë në 2-3 orë më dilnin lotë. Thash me vete unë do bëj dicka tjetër, do sjell Italinë në Shqipëri”, shtoi ajo.