Më në fund edhe firma e Miralem Pjanic është sigluar mbi kontratën e rinovuar me Juventus. Mesfushori i rezistoi tundimit të shumë klubeve elitare europiane, mes të cilave qëndronin edhe Barcellona, PSG e Chelsea, të cilat gjatë kësaj vere kanë tentuar gjithçka për ta bindur futbollistin që të ndryshojë fanellë.
Tentativa të gjitha këto të dështuara, pasi Pjanic është përgjigjur duke rinovuar kontratën e tij me Juventus edhe për dy sezone të tjera. Një rinovim i dakordësuar për për 6,5 milionë euro në sezon që do të përfitojë futbollisti. Kështu, Miralem Pjanic do të jetë bardhezi deri në vitin 2023. Vetë futbollisti ka preferuar ta ndajë gëzimin e tij me të gjithë mbështetësit, duke publikuar në llogarinë e tij në Instagram foton teksa nënshkruan kontratën e re, shoqëruar me diçiturën: “I lumtur të rinovoj kontratën me Juventus deri në 2023”, shoqëruar me hashtagun #FinoAllaFine.