Zbardh masat e reja që janë marrë në pistën e aeroportit të Rinasit pas grabitjes. Gazetari i Report Tv, Arsen Rusta raporton se asnjërit prejt punonjësve të kompanisë që duhet të garantojë sigurinë, ICTS-së që futet në pistë nuk do u lejohet më telefoni, as atyre që punojnë tek ngarkim shkarkimi i bagazheve.
Cdo automjet që futet në pistë përfshi dhe ato të ICTS-së do të raportojnë targat tek policia e më pas u miratohet leja. Cdo kompani që operon në pistë apo firmë përfshi dhe institucionet publike si hetimi tatimor e doganat dorëzojnë më parë listat e stafit, ata kontrollohen e më pas policia i pajis me fletëhyrje.
Këto masa pritet të vazhdojnë përgjithmonë. Ndërkohë Report Tv mëson se prej datës 9 prill asnjë bankë nuk lejohet të dërgojë para jashtë vendit nëpërmjet Rinasit deri në një urdhër të dytë.
Deri tani për grabitjen në Rinas janë arrestuar pesë persona; Oltion Veseli dhe Elton Pikli, të dy nga Kruja dyshohet se janë autorë, ndërsa Alkond Bengasi (i penduar i drejtësisë), Saimir Çela dhe Renaldo Sula akuzohen si bashkëpunëtorë.
Në kërkim janë; Talo Çela, Klement Çala, Eldi Çala, Marenglen Hoxha, ish-punonjës policie, Aleks Pepa dhe dy të tjerë. Ndërkohë që koka e grupit, Admir Murataj nga Tropoja, i arratisur në 2013 nga burgu grek u vra gjatë shkëmbimit me policinë.
