Fation Murati, në lokalin e të cilit ndodhi masakra e mbrëmjes së të dielës në Don Bosko, me një grua të vrarë dhe gjashtë të plagosur, mes tyre një vajzë 10-vjeçare, është një emër i lakuar në botën e krimit.
Verën e 2022, policia e Krujës, e shpalli në kërkim bashkë me miqtë e tij, Endrit Dokle, Ramazan Rraja, Gentian Reci, Rohan Brahimi e Alesio Dobrozi, nën dyshimet se ishte i përfshirë në masakrën e 3 fishtë te mbikalimi i Fushë Krujës mesditën e 17 korrikut të vitit të kaluar ku viktima mbetën Brilant Martinaj, Dikler Vata e Besmir Hoxha.
Policia kërkonte dëshminë e tyre dhe njoftonte pikat e kalimit kufitar që nëse ata paraqiteshin dhe dalje apo në hyrje të shoqëroheshin për t’u pyetur në lidhje me masakrën.
Ndërsa hetimet për masakrën vijonin, Fation Murati u ndalua teksa po udhëtonte në të njëjtin automjet me Endrit Doklen dhe familjen e këtij të fundit. Ish-kreu i njërit prej fraksioneve të bandës së Durrësit, i liruar me kusht, pasi u verifikua u la i lirë, ndërsa Murati u arrestua pasi dyshohej si posedues i armëve të zjarrit të gjetura në një kompleks rezidencial në kryeqytet. Për këtë bazë armatimi ishte arrestuar më herët 25-vjeçari nga Laçi Kristian Gjini. Gjykata e Tiranës caktoi për të masën e arrestit me burg, po ashtu apeli e rikonfirmoi këtë masë në tetor të 2022.
Pak ditë pas arrestimit, prokuroria i sekuestroi edhe pasuritë me vlerë 5 milionë euro, përderisa ishte dënuar nga drejtësia italiane për trafik lëndësh narkotike dhe vjedhje në kuadër të organizatës kriminale. Pavarësisht këtij backgroundi kriminal, gjyqtarja Migena Laska e zbuti masën e sigurisë për të dyshuarin duke e dërguar në arrest shtëpie, pasi u bë rikualifikim i veprës. Ai u akuzua vetëm për armëmbajtje në banesë dhe në këtë mënyra pozita e tij u lehtësua ndjeshëm, çka bëri që dyert e burgut për të, të hapeshin.
Aktualisht, Fation Murati është në proces gjykimi për armëmbajtje pa leje. Mbrëmjen e së dielës nuk është gjetur në shtëpinë e tij luksoze, kur policia shkoi për verifikim pas masakrës së Don Boskos. Policia ka dyshime se ai është arratisur jashtë vendit.
