Ulja drastike e ndotjes thuajse në të gjithë botën gjatë izolimit nga pandemia e koronavirusit duhet të çojë në një rritje të përgjegjshmërisë për mjedisin, pas heqjes së kufizimeve.
Kështu është shprehur Papa Françesku në meshën e së dielës në Sheshin e Shën Pjetrit, në Vatikan, teksa u ka bërë thirrje njerëzve të reflektojnë në marrëdhënien e tyre me mjedisin.
“Izolimi ka ulur ndotjen dhe zbuloi edhe njëherë bukuritë e kaq shumë vendeve, pa trafik dhe pa zhurmë. Tani, me rifillimin e aktiviteteve, të gjithë duhet të jemi më të përgjegjshëm për t’u kujdesur për shtëpinë tonë të përbashkët”, tha Ati i Shenjtë.
Me izolimin për shkak të pandemisë, niveli i ndotjes së ajrit dhe ujit u ul në shumë vende të botës. Në Venecia, ujërat e errëta të qytetit u pastruan për shkak të zvogëlimit të lundrimit të anijeve, saqë mund të shiheshin peshqit pas shumë vitesh.
