Guvernatori i Bankës së Shqipërisë, Gent Sejko mori pjesë në konferencën e 8-të të Bankës Qendrore Europiane për vendet e Europës Qendrore Lindore dhe Juglindore (EQLJL), me temë “Qëndrueshmëria ndaj zhvillimeve të pafavorshme globale? Reagimet e vendeve të EQLJL-së ndaj ndryshimeve në kontekstin tregtar dhe financiar”, mbajtur në Frankfurt, Gjermani.
E konceptuar në dy sesione dhe me pjesëmarrjen e përfaqësuesve të lartë të BQE-së, guvernatorëve të bankave qendrore të vendeve të EQLJL-së, si dhe ekspertëve të sektorit bankar dhe financiar, konferenca trajtoi sfidat e këtij rajoni në përgjigje të tronditjeve tregtare dhe reagimin e politikës monetare ndaj tronditjeve financiare.
Gjatë diskutimeve të konferencës, Guvernatori Sejko, në ndërhyrjen e tij mbi eksperiencën e Shqipërisë ndaj sfidave aktuale, theksoi se politika monetare është faktor stabiliteti në ekonomi dhe ka rëndësi në kreditimin e ekonomisë, si një proces i cili duhet mbështetur nga sektori bankar dhe më gjerë.
“Rezultatet pozitive të planit ndërinstitucional për uljen e kredive me probleme dhe konsolidimi i sektorit bankar janë faktorë të rëndësishëm që i japin frymëmarrjen e nevojshme ndërmjetësimit financiar të ekonomisë. Megjithatë, përmirësimi i klimës së biznesit dhe vazhdimi i reformave strukturore përbëjnë parakushte të padiskutueshme për nxitjen e kreditimit të qëndrueshëm dhe të shëndetshëm”, – u shpreh Sejko.
