Mjeku Erion Dasho ka reaguar i revoltuar me Komitetin e ngritur kundër koronavirusit, pas rasteve të reja me koronavirus.
Ai kërkon që t’iu hapin rrugën mjekëve të rinj si ai.
“Komiteti ynë i ekspertëve është një univers më vete. Ka një pjesë politike, me të cilën nuk ja vlen të merresh sepse nuk janë ekspertë, por politikanë. Pjesa “e urtë” është sa për dekor, është e ndërgjegjshme për këtë dhe prandaj “rri urtë”.
Pjesa dinjitoze (fatkeqësisht, në minorancë) i bën nder karriges ku është ulur. Dy përfaqësues të respektuar të kësaj minorance, këto ditë janë distancuar nga keqpërdorimi që i është bërë komitetit nga politika.
Pjesa gjithologe është pjesa më e dëmshme. Kjo pjesë është edhe infeksioniste, edhe epidemiologe, edhe imunologe, edhe njohëse e shëndetit publik. Sigurisht pa njohur asnjë nga këto shkenca ashtu siç duhet…
Gjithollogët bëjnë zhurmë, kërkojnë protagonizëm, debatojnë duke përdorur terma “shkencorë” (të cilët shpesh nuk i kuptojnë), ngrenë zërin, akuzojnë, kërcënojnë dhe prishin punë më shumë se gjithë të tjerët bashkë.
Së fundi, kanë nisur të ngjallin edhe panik (ndoshta të nxitur apo të joshur). Mësuan nga gjithollogët ndërkombëtarë se po të ngjallësh panik, ngjall edhe respekt…
Boll!!!
Mjaft dëm i sollët këtij vendi!
Bëni punën tuaj për të cilën paguheni sa nga shteti, sa nga projektet të cilat kanë 30 vjet që financohen, por akoma nuk kanë qullosur gjë.
Keni 30 vjet që ngrini sistem “survejance” dhe kur ky sistem lipset, nuk është gjëkundi.
Keni 30 vjet që “trajnoni” mjekë dhe infermierë dhe kur këta duhen nuk janë.
Keni 30 vjet që ngrini laboratorë, por kur këta laboratorë duhen, nuk jeni të gjëndje të testoni as sa vendet afrikane.
Më mirë, maft!
Hapni krahun dhe lini të rinjtë të bëjnë diçka!
Boll na morët më qafë”, shkruan ai.
Është interesant fakti se kur Komiteti vendosi izolimin e Shqipërisë, për të penguar përhapjen e koronavirusit, Dasho i quante të paaftë e kërkonte hapjen e vendit, pasi sipas tij, s’kishte rrezik infektimi.
Tani që vendi është hapur, sërish thotë se ata janë të paaftë, se po na infektojnë.
