Konsiderohej si një ndër kryeveprat inxhinierike të kohës. Është cilësuar edhe si më moderni, e më i veçanti dhe u jetësua nga fundi i shek. XVIII e fillimi i shek. XIX,
Njihet si ujësjellësi i Kalasë së Gjirokastrës dhe është ndërtuar nga Ali Pashë Tepelena (vdiq më 1822), kur ishte në kulmin e pushtetit të tij, në krye të Pashallëkut të Janinës.
Uji nëpërmjet një sistemi kanalizimesh e tubacionesh prej 12 kilometrash me ura guri e harqe, vinte nga mali i Sopotit dhe furnizonte depozitat në kala, për tu shpërndarë më pas në qytet.
Kanë mbetur pak copëza kujtimesh të shkuara nga kjo vepër sot; Një urë në pjesën e sipërme të lagjes Dunavat dhe disa fragmente muresh e harqesh në zona të ndryshme.
Deri në mesin e shek. XIX ka qenë në këmbë dhe funksional, siç mund të shihet nga kjo pikturë (poshtë) e britanikut të famshëm Eduart Lir që kaloi më 1848 nëpër Shqipëri.
Ndërsa në foton (lart) e fiksuar para Luftës I Botërore (1914-1918), shihen vetëm këmbë urash pranë kalasë, ndërkohë sistemi që dërgonte ujin brenda saj, kishte rënë.
/Marrë nga Alfred Pez@, blogu personal
