Qarku Shkodër po përballet këtë të dielë, 26 tetor, me reshje shiu të intensitetit të lartë në të gjithë pesë bashkitë: Shkodër, Malësi e Madhe, Vau Dejës, Pukë dhe Fushë Arrëz.
Sipas Prefektit të Qarkut, situata paraqitet më problematike në disa zona rurale dhe përmbytjet po shkaktojnë shqetësim për banorët.
Në Fushë Arrëz, raportohen rënie gurësh dhe inertesh në rrugë rurale dhe prezencë uji në akset rrugore.
Në Vaun e Dejës, ka përmbytje banesash në njësitë administrative Bushat, Vau Dejës dhe Hajmel.
Lumi Glinë rrezikon të dalë nga shtrati, duke kërcënuar një të tretën e territorit të qytetit.
Në njësinë administrative Gur i Zi, po merren masa për pastrimin e urës dhe përroit që ka krijuar problematika.
Nga drejtoria e Ujitjes dhe Kullimit në Lezhë bëjnë të ditur se kanalet kryesore, argjinaturat mbrojtëse dhe diga e rezervuarit Shtoder nuk kanë shfaqur probleme deri tani, megjithëse situata po monitorohet në terren dhe do të ndërhyhet menjëherë në rast nevoje.
