Duke konfirmuar faktin që reparti “Shqiponja” do t’i nënshtrohet një hetimi për mënyrën se si funksionon, Kryeministri Rama tha se duhet bërë gjithçka që ngjarje si vrasja e Klodian Rashës të mos përsëritet më kurrë.
“Nuk është nevoja të ndodhë prapë dhe kurrë mos ndodhtë më për 1 mijë vite dhe nuk është nevoja të jetë kaq ekstreme ngjarja por duhet të vlejë për të analizuar të gjithë nivelet tekniko profesionale, edhe në aspektin e motivimit psikologjik shkallën e gatishmërisë së trupave që janë në atë zinxhir, nivelin e trajnimit të tyre, cilësinë e trajnuesve të tyre, procesin në vetvete. Pa shkuar te ekstremet kemi bërë jashtëzakonisht shumë së bashku për të larguar gjithmonë e më shumë efektivin e policinë në rrugë nga lidhja e menjëhershme me bakshishin, me korrupsionin. Nuk duhet të gënjejë mendja askënd që kjo është një betejë e fituar, është një betejë që duhet të vazhdojë. Të gjitha duhen parë më vëmendje, ajo që ndodhi nuk e kthen më në jetë Klodianin edhe sikur ne të gjithë së bashku të japim jetën tonë. Por ajo që ndodhi duhet të shërbejë që të mos ndodhin kurrë të tilla tragjedi. Zbardhja e ngjarjes është meritë e drejtorit të SHÇBA, drejtorit të Policisë së Shtetit dhe padyshim Sandër Lleshaj.
