Këshilli i Emërimeve në Drejtësi ka miratuar këtë të hënë listën përfundimtare të kandidatëve për Inspektor të Lartë të Drejtësisë, listë e cila do t’i dërgohet brenda tri ditësh Kuvendit të Shqipërisë për miratim.
Ende nuk dihet nëse Kuvendi i Shqipërisë do të votojë për kreun e ri të këtij institucioni brenda punimeve të kësaj jave, teksa mbyllet sesioni i vjeshtës për t’u rihapur në fund të muajit janar.
Ashtu sikurse është bërë me dije më herët, i pari në listë është renditur Avokati i Përgjithshëm i Shtetit, Artur Metani.
Lista përfundimtare e renditjes:
1. Artur Metani 89.6 Pikë
2. Sokol Stojani 89 Pikë
3. Joana Asimi Sorraj 82.2 Pikë
4. Eris Hysi 78.3 Pikë
5. Lindita Troja 63.4 Pikë
Sipas KED-së, dy vendimet e arsyetuara, raporti dhe aktet e tjera të pikëzimit të kandidatëve do të publikohen nesër ne faqen zyrtare të Gjykatës së Lartë.
Gara për Inspektor të Drejtësisë u hap fillimisht më 1 mars të këtij viti, gati tri vite pas miratimit të reformës në drejtësi dhe u rihap sërish më 9 shtator.
“Lista do t’i dërgohet Kuvendit të Republikës së Shqipërisë, brenda tre ditëve, sipas parashikimeve të nenit 200 shkronja “ë” të ligjit nr. 115/2016”, thuhet në njoftim.
