Kreu i grupit parlamentar të LSI-së, Petrit Vasili ka komentuar mbrëmjen e sotme përzgjedhjen e emrave nga ana e mazhorancës, për anëtarët e KLP-së dhe KLGJ-së.
Sipas Vasili, ky është fundi i Reformës në Drejtësisë.
Ja çfarë shkruan Petrit Vasili në Facebook:
Antireforma e goglave të fatit ose fundi i Reformës në Drejtësi.
Standardet e reja që Reforma në Drejtësi synoi, u rrëzuan përtokë dhe u nëpërkëmbën.
Kandidatët e skualifikuar se nuk plotësojnë kriteret, duke dhunuar ligj e kushtetute u futën në listë e u votuan nga kryeministri.
ONM ose prania e SHBA dhe BE edhe në Kushtetutë si garanci e integritetit u përbuz e u poshtërua nga kryeministri. Atë që ONM tha, kryeministri nuk e fishkëlleu fare.
E gjithë Reforma në Drejtësi degradoi turpërisht thjesht si një hedhje goglash apo një bixhoz i rëndomtë.
Një grup rrënuesish të Reformës në Drejtësi me kryeministrin e inkriminuar në krye shkatërruan dhe denatyruan ëndrrën e shqiptarëve për një drejtësi të re të pakapur e të barabarte për të gjithë.
Milionat që po shpenzon SHBA dhe BE janë shpërdorimi më i madh dhe korruptiv i parave pasi Reforma në Drejtësi katandisi në një DREJTËSI GOGLASH FATI.