Po vërehet një ngutje deri në tërbim për të arrestuar ish ministrin e Brendshëm, deputetin aktual të PS Saimir Tahiri. Janë involvuar që nga kryeprokurori Adriatik Llalla, kreu i PD Lulzim Basha bashkë me “mentorin” e tij politik Sali Berisha, Presidenti i Republikës Ilir Meta bashkë me bashkëshorten e tij në krye të LSI Monika Kryemadhi, e deri tek Koço Kokëdhima, “babai” i legalizimit të kanabisit në Shqipëri, Shkelzen Berisha e Fatmir Mediu që hodhën në erë Gërdecin dhe tërë llumi i shoqërisë shqiptare.
Ka një habi me këtë ngutje për ta arrestuar Tahirin sa më shpejt, sa dhe në kërkesën ndaj Kuvendit kërkohet leje për arrestimin, heqjen e lirisë së Tahirit, një rast i paprecedent i ndodhur që nga koha e Enver Hoxhës në Shqipëri. Kur urdhërohej nga politika arrestimi i ministrave, deputetëve dhe funksionarëve partiakë në sallën e mbledhjes siç ka ndodhur me Kadri Hazbiun dhe hierakët e tjerë komunistë. Dhe kjo ngutje e ka një bazë.
Në nëntor ikën nga drejtimi i Prokurorisë së Përgjithshme Adriatik Lalla. Jo vetëm se i skadon afati në krye të organit të akuzës, por se nuk mban më ujë pilafi me shtyrjen e zbatimit të ligjit të Vettingut dhe të Reformës në drejtësi nga Berisha dhe Meta. Duke qënë se drejtësia e re do të filtrohet nga partnerët tanë ndërkombëtarë SHBA-BE dhe ekspertët e tyre, pas mesit të nëntorit nuk ka më asnjë shans që Berisha dhe Meta të bëjnë politikë përmes Prokurorisë dhe Gjykatës, pasi “zarat” e tyre, Llalla dhe gjyqtarët e emëruar prej tyre do të jenë “viktima” të Vettingut. Nuk do të ketë më vend për ta në sistemin e drejtësisë.
Kjo është arësyeja e parë e ngutjes së Llallës dhe “mentorëve” të tij politikë Meta dhe Berisha për ta futur sa më shpejt në qeli ish ministrin Brendshëm dhe deputetin e PS, jo Saimir Tahirin si individ.
Arësyeja e dytë është se në nëntor, sipas të gjitha informacioneve zyrtare, të deklaruar dhe nga kryeministri Edi Rama, në Tiranë zbarkojnë agjentët amerikanë të antidrogës, antikrimit dhe të drejtësisë, të cilët do të marrin situatën në dorë. Pikërisht për këtë arësye Llalla dhe mbështetësit e tij në politikë, Berisha dhe Meta e duan Saimir Tahirin ish ministër të Brendshëm, në qeli. Për të filluar Vettingun dhe Reformën në Drejtësi pikërisht me ish ministrin e Brendshëm dhe për të fituar sadopak kohë dhe për të përfituar nga situata që mund të krijohet. Me shpresën se Reforma në Drejtësi të mos fillojë nga krimet e tyre. Ndaj nguten për arrestimin e Tahirit, për të arritur që agjentët amerikanë ta gjejnë në qeli ish ministrin e Brendshëm.