Policia e Shtetit është institucioni më i vlerësuar në raportin vjetor të organizatës prestigjoze Freedom House.
Raporti duke iu referuar sondazheve me publikun thekson se është rritur besimi tek Policia e Shtetit. “Gjatë vitit 2017 ka pasur progres përsa i përket luftës ndaj korrupsionit në administratë dhe ndaj mitmarrjes, veçanërisht në forcat e policisë. Gjithashtu ka pasur progres në luftën kundër drogës, e cila është reflektuar edhe në uljen e kultivimit të kanabisit”, citohet Raporti i FH.
Më tej, duke iu referuar agjencive ligj zbatuese italiane, nënvizohet se kultivimi i kanabisit ra në mënyrë drastike gjatë vitit 2017. “Sipas raportit të Policisë italiane, kultivimi i kanabisit ka rënë në mënyrë drastike në Shqipëri gjatë vitit 2017, nga 219 hektarë në vitin 2016 në 1.9 hektarë dhe kjo falë ndërhyrjes së policisë shqiptare”, shkruhet në raport.
Përsa i përket korrupsionit, thuhet se hapa pozitiv janë bërë në këtë drejtim, sidomos në forcat e Policisë, me një ulje të ndjeshme të përceptimit të qytetarëve. “Ka pasur disa rezultate pozitive në fushatën e qeverisë kundër korrupsionit, të cilat janë reflektuar në sondazhe, ku të anketuarit tregojnë se korrupsioni ishte i përhapur me 52% në forcat e policisë, 11% më pak se në 2016, ku ishte 63%”.
Freedom House ndërkohë vlerëson si pozitiv edhe uljen e numrit abuzimeve të policisë në paraburgim. “Komiteti Shqiptar i Helsinkit ka raportuar për një ulje të numrit të personave që janë ankuar për abuzime nga policia në paraburgim”.
Në kuadër të reformës në drejtësi do të ngrihen edhe 3 institucione të reja për të luftuar korrupsionin e nivelit të lartë: Gjykata Speciale, Prokuroria Speciale kundër korrupsionit dhe krimit të organizuar, dhe Byroja Kombëtare e Hetimit, modeluar sipas FBI-së në SHBA. Në mes të korrikut nënvizon raporti, 12 oficerë nga Byroja Federale e Hetimit (FBI) në SHBA, erdhën në Tiranë për të trajnuar anëtarët e rinj të Byrosë Kombëtare të Hetimit të Shqipërisë.
