“Mbretëria e Bashkuar duhet të vazhdojë mbështetjen për vendet e Ballkanit Perëndimor dhe anëtarësimin e tyre në Bashkimin Europian”, sipas raportit të publikuar nga Komisioni për Marrëdhënie Ndërkombëtare i Dhomës së Lartë të Parlamentit britanik, “Mbretëria e Bashkuar dhe e Ardhmja e Ballkanit Perëndimor”.
Në raport mes të tjerave shkruhet se Mbretëria e Bashkuar duhet të vazhdojnë angazhimin e saj në rajon së bashku me partnerët ndërkombëtarë për të mbrojtur progresin e bërë në rajonin e Ballkanit që në vitet ’90.
Në raport gjithashtu theksohet se të gjitha vendet e Ballkanit Perëndimor synojnë anëtarësimin në BE. Shqipëria dhe Mali i Zi janë tashmë anëtare të NATO-s, ndërsa Maqedonia, Bosnja e Hercegovina dhe Kosova synojnë të anëtarësohen në NATO, megjithëse secili prej këtyre vendeve po përballet me sfida serioze.
Duke komentuar raportin, Kreu i Komisionit Lord Howell i Guildford tha se “Britania duhet të angazhohet me partnerët në BE dhe ata ndërkombëtarë për promovimin e stabilitetit dhe reformave demokratike në Ballkanin Perëndimor, gjë që është në interesin e të gjithëve. Ne mirëpresim vendimin e qeverisë për të organizuar Samitin e Ballkanit Perëndimor këtë vit dhe e shikojmë si një simbol të angazhimit të qeverisë në rajon edhe pasi Mbretëria e Bashkuar të dalë nga Bashkimi Europian”.
Sakaq në konkluzionet dhe rekomandimet e raportit shkruhet se:
-Perspektiva e Brexit ka një ndikim në rajon dhe kërkon një riafirmim të fortë të angazhimit britanik.
-Angazhimi kërkon mënyra të reja të koordiminit dhe bashkëpunimit me BE-në dhe vendet anëtare të tij.
-Komisioni pajtohet me mbështetjen e Qeverisë për vendet e rajonit të anëtraësohen në NATO dhe BE si dhe objektivat e tyre, si dhe mbështet përpjekjet për të kaluar pengesat ndaj këtyre objektivave.
-Ndikimet destabilizuese të fuqive të jashtme, në mënyrë të veçantë Rusisë, duhet të duhet të kundërshtohen me këmbëngulje dhe në mënyrë të vazhdueshme.
-Samiti i Ballkanit Perëndimor duhet të tregojë mbështetjen e Mbretërisë së Bashkuar për lirinë e shtypit, sundimin e ligjit e ligjit dhe rolin e shoqërisë civile në demokracitë e hapura.
-Mbretëria e Bashkuar duhet të vazhdojë mbështetjen në përpjekjet për të luftuar korrupsionin dhe krimin e organizuar në rajon dhe të vazhdojë bashkëpunimin e ngushte me BE-në për çështjet e drejtësisë dhe ato të brendshme në interest të sigurisë kombëtare.
-Mbretëria e Bashkuar duhet të vazhdojë të ofrojë trajnim dhe këshillim për agjencitë e rajonit përgjegjëse për të luftuar terrorizmin dhe de-radikalizimin.
Samiti i Ballkanit Perëndimor që organizohet në Londër në muajin korrik të këtij viti është takimi i pestë i vendeve të rajonit në kuadër të procesit të Berlinit që nisi në 2014 nga Gjermania për të treguar angazhimin e Bashkimit Europian ndaj aspiratave të vendeve të Ballkanit për anëtarësim.
