Europol ka publikuar raportin për narkotikët, për periudhën 2015-2016, gjatë të cilës ajo që vihet re është “epidemia” e drogërave sintetike, të cilat kanë hyrë në tregjet e konsumit me 620 substanca të reja.
Shumica e këtyre substancave prodhohen në territorin e vendeve të BE-së dhe më pas shiten në treg përmes grupeve kriminale, ose faqeve të shumta të internetit.
Të njohura si “substanca psiko-aktive”, drogërat në fjalë nuk përfshihen nga kontrollet ndërkombëtare të narkotikëve. Substancat më të përdorura janë kryesisht kanabisi gjenetikisht i modifikuar, stimulantët dhe ato me bazë opiumi.
Këto drogëra përbëjnë një rrezik të lartë për shëndetin dhe në vitin 2015, në Europë u konstatuan të paktën 32 vdekje si pasojë e konsumimit të tyre.
Një tjetër tregues shqetësues është rritja e përdorimit të heroinës, e cila sjell dhe fitime të mëdha për grupet kriminale. Pavarësisht raportimeve për një rënie të konsumit, nivelet e larta të sasisë së heroinës të kapura në vendet e BE-së tregojnë se kërkesa për këtë mall mbetet e lartë.
Organizatat kriminale që merren me trafikimin e saj bazohen në struktura të ngritura ndër vite bazuar në modelin e bizneseve dhe përfitimet janë kolosale.
Shumica e heroinës së konsumuar në vendet anëtare të BE-së hyn përmes akseve ballkanase, në rrugë detare ose ajrore; si dhe nga rajoni i Kaukazit të jugut.
Sa i takon Shqipërisë, ajo mbetet burimi kryesor i kanabisit i cili trafikohet në vendet e Bashkimit Europian. Rrugën e trafikimit janë nga deti ose nëpërmjet pikave të ndryshme kufitare. Gjithashtu përdoren anije ose gomone për të çuar drejt vendeve të BE-së, tonelatat e drogës”, theksohet në raportin e EUROPOL.
