Ditën e sotme kryeministri i Shqipërisë Edi Rama ka zhvilluar një vizitë zyrtare në Izrael.
Përmes një postimi në faqen e tij në Facebook, Rama tha se vizita do të bëhet me ftesë të kryeministrit, Yair Lapid.
Mediat izraelite nga ana tjetër kanë shkruar se Rama po e viziton Izraelin për të forcuar mbrojtjen kibernetike të vendit të tij, pas një sërë sulmesh nga Irani që çuan në ndërprerjen e marrëdhënieve diplomatike me Teheranin.
Ata thonë se gjatë vizitës së tij në Izrael, Rama planifikon të takohet me kreun e Drejtorisë Kombëtare të Kibernetikës dhe kompanitë kryesore izraelite në këtë fushë, si dhe me kryeministrin Yair Lapid, Presidentin Isaac Herzog, Kryetarin e Knessetit Mickey Levy dhe liderin e opozitës Benjamin Netanyahu.
Sulmi kibernetik iranian ndaj Shqipërisë në fillim të këtij viti kërcënoi të paralizojë shërbimet publike dhe sistemet dixhitale, të hakojë të dhënat shtetërore dhe të mbjellë më tej kaos. Hakerët publikuan të dhënat personale të anëtarëve të qeverisë shqiptare.
Rama tha në shtator se vendimi i vendit të tij për të ndërprerë marrëdhëniet me Iranin ishte “një përgjigje ekstreme… që është e padëshiruar, por totalisht e detyruar, është plotësisht në përpjesëtim me gravitetin dhe rrezikun e sulmit kibernetik që kërcënoi të… nxisë kaos dhe pasiguri në vend.”
Mediat izraelite thonë se Rama gjithashtu kërkon të çojë përpara një samit të kryeministrave ballkanikë në Izrael, për të forcuar lidhjet e tyre me shtetin hebre në fushat e energjisë, bujqësisë, kibernetikës etj.
Biznesmeni izraelito-kazak, Alexander Machkevitch, i cili drejton një nga kompanitë më të mëdha në botë të minierave dhe prodhimit të lëndëve të para, Euroasian Resources Group, ishte i përfshirë në koordinimin e vizitës së Ramës në shtetin hebre.
Marrëdhëniet shqiptaro-izraelite sipas medias izraelite
Shqipëria, një shtet me shumicë myslimane,që ka pasur marrëdhënie me Izraelin që nga viti 1991.
Është i vetmi vend në Evropë me një popullsi më të madhe hebreje pas Luftës së Dytë Botërore se përpara saj; vendi kishte 200 banorë hebrenj para luftës dhe doli me 2000, shumë prej të cilëve ishin hebrenj të strehuar nga vende të tjera. Shqipëria ishte vendi i parë me shumicë myslimane që miratoi përkufizimin e punës të Aleancës Ndërkombëtare të Përkujtimit të Holokaustit për antisemitizmin në vitin 2020.
Izraeli pranoi refugjatë shqiptarë nga Kosova gjatë Luftës së Kosovës në vitin 1999 dhe ekspertët e kërkim-shpëtimit të IDF-së ndihmuan Shqipërinë pas një tërmeti vdekjeprurës në 2019.
